Di mominos 63 sa 150 sa first-batch sa mga lalaki nga persons deprived of liberty (PDL) nigraduwar sa jail-based rehabilitation program sa bag-ong pasilidad sa dakbayan sa Mandaue sa Bureau of Jail Management and Penologyn (BJMP) sa Sitio Dungguan, Brgy. Basak sa Biyernes, Oktubre 6, 2023.
Ang tanang graduwado nakadawat og Certificate of Program Completion nga hayan ilang magamit isip referral sa pag-apply sa bisan unsang trabaho gawas sa prisuhan o pagbalik sa ilang komunidad.
Si BJMP-Mandaue Jail Superintendent Jonathan Baltar niingon nga ang mga graduwado nakagawas na sa prisohan human sa programa.
Apan kadtong makonbikto sa kalapasan ubos sa Section 5 ug 11 sa Republic Act (RA) 9165 o Comprehensive Dangerous Drugs Act of 2002 mahimong mopailawom sa counseling ug laing rehabilitasyon, kansang gidugayon magdepende sa korte.
Usa sa mga nakagawas na sa prisohan niadtong Septiyembre 22 mao si Ed (tinuod nga ngan gipugngan), wala magduha-duha sa pagbalik sa BJMP alang sa iyang gradwasyon sa programa nga nakapausab sa iyang kinabuhi ug nakapaamgo niya sa iyang mga sayop nga binuhatan.
Si Ed gidakop tungod sa paggamit sa ilegal nga drugas niadtong Nobiyembre 24, 2022.
Matod niya, karon nga aduna na siyay bag-ong kinabuhi ug gusto nga mobalik isip drayber sa taxi.
“Diri ko nakat-un mag-ampo. Kon wala ko diri, wa ko kaamgo so mibalik gyud ko,” matod ni Ed
Kini nga programa usa sa mga paningkamot nga makunhoran ang gidaghanon sa mga PDL sa selda ug matabangan ang mga biktima sa drugas nga makabaton og bag-ong kinabuhi.
Ubos kini sa pagpasiugda sa Mandaue City Government ug Mandaue City Substance Abuse Prevention Office (MCSAPO) ug plano nga i-institutionalize sa tanang korte.
Si Atty. Ebenezer Manzano, MCSAPO head ug action officer sa Anti-Drug Abuse Council (MCADAC), niingon nga nagsugod kini niadtong Pebrero ning tuiga uban sa tumong nga matabangan ang BJMP para maximize ang recovery sa drug detainees.
Ang BJMP-Mandaue adunay 1,563 ka lalaki nga piniriso ug 125 ka babaye.
Base sa datus sa BJMP-Mandaue, niadtong Oktubre 6, 588 sa 1,563 ka lalaki nga piniriso ang nakombikto sa ilegal nga drugas, ug 87 porsiyento, o 109 sa 127, alang sa mga babaye’ng piniriso. (HIC)