Usa ka menor de edad ug retiradong sakop sa Philippine Air Force (PAF) ang apil sa nasikop sa pagronda sa Police Station 5 sa Lapu-Lapu City Police Office (LCPO) sa tigbakayan sa Sitio Sewage, Barangay Pusok, niadtong Dominggo, Hulyo 4, 2021 alas 2:25 sa hapon.
Ang 17-anyos nga nasikop taga Humay-Humay Road sa Barangay Gun-ob, Lapu-Lapu.
Ang retiradong sakop sa PAF nailhang si Alberto Casinilio Sancho, 68, ug molupyo sa Sangi Road, Barangay Pajo, Lapu-Lapu.
Matod ni Police Major Aibert Jay Samson, hepe sa Police Station 5 sa LCPO, nga nakadawat sila og taho kalabot sa grupo sa mga tawo nga nagpahigayon og tigbakay hinungdan nga dali kini nilang girespondihan.
Naabtan sa kapulisan ang grupo hinungdan nga ilang gipangsikop.
Subling gipahinumdom ni Samson sa publiko nga gidili ang pagpahigayon og tigbakay ubos sa balaud hilabi na usab niining panahon sa pandemya, bisan og naa kini gihimo sa ilang tugkaran sa balay sa nagpasiugda niini.
Laing lima ang nasikop usab sila Benigno Orellana Calintig alyas Benig, 35, molupyo sa Sewage, Bangay Pusok apan lumad nga taga Dumaguete City sa Negros Oriental; Florante Caña Sancho alyas Ante, 41, contruction worker ug taga Barangay Pajo; Zoreen Señoran Bandigas alyas Zoren, 31, taga Sangi, Pajo; Christian Jay Cerna Magaypo alyas Dimple, 19, taga Sangi, Barangay Pajo apan lumad nga taga Cabadbaran, Agusan Del Norte; ug Micheal Cabuñas Patalinghug alyas Esoy, 23, metal installer ug taga Sangi, Barangay Pajo.
Nakuha sa posisyon sa dinakpan ang duha ka manok igtatari nga may mga buwang, dul-ansa P1,000 nga gituohang pusta sa grupo ug uban pa nga mga kahimanan sa buwang.
Ang mga dinakpan gikatakdang mag-atubang og kasong kalapasan sa Presidential Decree (PD) 1602 kun pagpasiugda og illegal cockfighting. (GCM)