GINANG napaig human nasunog ang iyang balay alas 11:41 sa Huwebes sa gabii, Marso 18, 2021, sa Sitio Buyo, Barangay Binongkalan, Catmon amihanang Sugbo.
Si Remedios Milan, 74, biyuda, napaig na dihang naabot ang mga bombero ug kapulisan sa iyang balay nga usa sa nasunog.
Si Police Corporal Vergil Ortiz, sa Catmon Police Station nga nahinabi sa Superbalita Cebu nagkanayon nga dunay nitawag sa ilang buhatan ingon man sa Carmen Central Fire Station sa lungsod sa Carmen kabahin sa sunog.
Sa ilang pag-abot sa dapit, nasunog na ang duha ka mga balay, usa ini kang Milan, diin didto siya sa sulod.
Ang sunog nga giisa sa first 1st alarm nidanyos og P20,000.
Matod ni Ortiz, sa imbestigasyon sa bombero, ang sunog nagsugod sa electric post nga ang linya diretso sa balay ni Milan.
Ang biktima gikataho nga na trap sa sulod sa iyang balay.
Nag-inusara na lang siya kay namatay na ang iyang bana, samtang ang mga anak ug kaliwat toa sa Davao.
Ang local government unit (LGU) ug barangay na lang ang mopahiluna sa pagpalubong kaniya. (GPL)