WALO ka mga tawo ang gipamatay dinhi sa Sugbo sukad niadtong Nobiyembre 1, Huwebes, hangtod sa Sabado, Nobiyembre 3.
Usa sa mga gipatay mao ang 62 anyos nga lola, kinsang lawas nakaplagan nga gisud sa usa ka gubaong refrigerator kagahapon sa alas 11 sa buntag sa Barangay Tabunok, dakbayan sa Talisay.
Tulo ka mga tawo ang gitan-aw nga suspek sa pagpatay kang Victoria Po Loa, nagpuyo sa nahisgutang dapit, kinsa giingon nga gitulis ug gipatay.
Napalgan ang lawas ni Loa nga gisulod sa usa ka refrigerator sa usa ka bodega duol sa usa ka banko sa Barangay Tabunok.
Matod sa hepe sa Talisay City Police nga si Police Supt. Marlu Conag nga posibleng gitulis una gipatay si Loa.
Tungod kay abli na ang vault sa panimalay niini, apan ning pagkutlo sa balita wa pa masuta kon pila ang nakuha.
Nobiyembre 1 dihang nitaho sa kapulisan ang usa ka pag-umangnkon ni Loa aron ipahibawo nga missing ang iyang tiya.
“Robbery most likely ito, vault found outside opened na,” si Conag nagkanayon.
Si Loa nag-inusarang nagpuyo sa iyang balay nga ancestral house sa pamilya.
Giunay
Patay nang nadangat sa tambalanan ang usa ka security guard human pusila sa kaubang gwardiya, alas 4:15 Sabado sa hapon, Nobiyembre 3.
Ang biktima giila nga si Alexander Peras, 51, kinsa nakaangkon og samad pinusilan sa dughan.
Ang suspek kinsa mao ra usab ang nitawag og pulis mao si Jimmy Taguba, 47.
Ang duha parehong nagbantay og warehouse sa sitio Pilapil, Barangay Umapad ug parehong on duty, nanag-inom.
Pangangkon sa suspek nga hubog nang daan si Peras sa dihang nanghagad og inom alas 2 sa hapon.
Giingong kalit lang nagmaoy si Peras bisan og wa sila naglalis, nikuha kini sa kutsilyo nga gamit sa ilang pagluto ug dayon dunggab kang Taguba.
Matod ni Taguba nga suway siya nga nisanta unta kang Peras, apan wa mohunong sa pagpanunggab hinungdan nga naigo siya sa bukton.
Siya nipalayo kang Peras, apan giingon nga niapas kini, nakita niya ang armas sa biktima, nailog kini ug maoy gigamit sa pagpusil ka usa ka higayon.
Apan way swerte kay naigo sa dughan si Peras hinungdan sa iyang hinanaling kamatayon.
“Mangayo lang gyud ko og pasaylo sa pamilya ni Alex. Wa gyud koy intention nga patyon siya, self defense lang gyud to ako. Amigo gud mi, wa ko kahibaw ngano to kalit siya nanunggab nako, pasayloa lang gyud ko,” hangyo ni Taguba.
Matud ni PO1 Gail Agosila, imbestigador sa Opao Police Station, nga kasong homicide ang ipasaka batok kang Taguba.
Si Taguba napriso na karon sa Opao Police station.
Gipusil, gidunggab
Niadtong Nobiyembre 2 dihang patay sa pagpamusil si Begie Buhanghang, 35, human gipusil sa wa pa mailhing mamumuno sa Sitio Soong 1, Barangay Mactan, Lapu-Lapu City.
Nasayran nga aduna’y pending nga kaso si Buhanghang sa dakbayan sa Sugbo kabahin sa drugas diin mao ang gitan-aw nga motibo.
Duha ang patay usab sa pagpanunggab sa Barangay Daanlungsod, dakbayan sa Toledo niadtong Nobiyembre 1.
Mga biktima giila nga sila si Jonel Cabaluna, 42, ug si Eniego Sibugal Jr.
Giingong unang giatake ni Cabaluna si Sibugal apan dihang nakit-an sa paryente ni Cabaluna ang insidente, niapil kini.
Patay ang duha samtang ang mga suspek nga sila si Remedio Cabaluna, Jonel Cabaluna, Helbert Larino, ug Dino Larino nangadakpan.
Alas 5:30 sa hapon sa susamang adlaw dihang patay usab si Edelaido Aldaya, 60, human gipusil ni Johnrich Alcuizar.
Nasayran nga nag-inom si Aldaya uban ang iyang higala nga si Emilio Solon Jr., 43, sa P. Nellas st., Brgy. Poblacion 3, Carcar City dihang naabot ang suspek ug gipamusil sila.
Samdan si Solon sa insidente samtang padayon pang gipangita si Alcuizar.
Usa ka oras ang nakalabay sa Brgy. Hemensolan, San Francisco, isla sa Camotes dihang gipusil patay usab si Romulo Barrientos, 53, mananagat. Wa pa masuta ang motibo sa pagpamusil.
Alas 8 sa gabii sa samang adlaw dihang patay usab si Joseph Umandac, hamtong, dihang gipusil sa wala pa mailhing mamumuno.