Walo ka mga piniriso gikan sa Cebu Provincial Detention and Rehabilitation (CPDRC) positibo sa coronavirus disease (Covid-19).
Kini maoy gipahibaw sa Integrated Provincial Health Office (Ipho) sa Disyembre 9, 2020.
Si Dr. Christina Giango, pangu sa Ipho, nagkanayon nga molaya na unta ang maong mga piniriso.
Apan subay sa protocol sa prisohan, kinahanglan nga ipaubos una sila sa pito ka adlaw nga isolation kun kwarantinas ug sila kuhaan og swab samples.
Dinhi sila nadiskobrehan nga positibo sa Sars-CoV-2, nagdala sa Covid-19.
“Molaya na baya na sila protocol na nila nga before sila i-out i-swab sila... ika-14 nana sila nga batch sa mga nakalaya pero karon pa nga naay nag positive,” matod ni Giango sa Disyembre 9. Pulos mga lalake ang mga nag positibo sa sakit nga padayon nga gi-monitor sa mga health personnel sukad sa Nobiyembre 27.
Matod ni Giango nga padayon nga nag-steam inhalation o tuob ug nagbaton og healthy lifestyle ang tanan nga anaa sa sulod aron pagsiguro nga malikay sa sakit.
Kon duna man ganiy mabatyagan nga simtomas, ilahi kini sa mga inmate ug ipaubos sa isolation.
Ang CPDRC adunay 1,485 ka inmates, diin 1,399 ang mga lalaki ug 86 ang mga babaye.
Sa kinatibuk-an, moabot na sa 56 ang mga nataptan sa Covid-19 sa sulod.
Niadtong Abril nakaplagan nga dunay mga binilanggo nga nangatakdan sa Covid-19, kaagaran kanila mga asymptomatic kun way mga simtomas sa sakit.
Gawas sa mga piniriso, duna say mga jailguard nga nangatakdan, sagad kanila mga taga dakbayan sa Sugbo.
Di lang ang CPDRC maoy naigo sa Covid-19.
Bisan ang Cebu City Jail nag-atubang og dakong problema dihang nilapas na sa 300 ka mga piniriso ang nangatakdan ug dunay nangamatay.
Napugngan ra ang pagdaghan pa sa mga kaso dihang gipatuman ang estriktong quarantine ug gidili na ang pagduaw sa mga kabanay sa mga binilanggo sukad sa pagsugod sa pandemic. / ANV