Kapin sa 800 ka mga overseas Filipino workers (OFWs) nga padulong sa Kuwait ang na-stranded sa Pilipinas tungod sa pagsuspenso sa pag-isyu sa visa sa nasod sa West Asia.
Sa online media briefing sa Biyernes, Mayo 19, 2023, si Department of Migrant Workers (DMW) Secretary Susan Ople niingon nga aduna nay 815 ka mga OFW ang wala makabiya sa nasod human ang Kuwait nagdumili sa paghatag og visa sa mga Filipino.
“The number of directly affected workers, as of today (Friday), is at 815,” matod ni Ople.
“They should have been earning by now had it not been for the visa suspension,” dugang niya. (Kana nikita na unta sila karon kon dili tungod sa suspension sa visa.)
Sa 815, si Ople miingon nga 514 ang na-recruit isip mga domestic worker.
Ang ubang mga stranded nga OFWs ipakatap unta isip mga waitress/waiter, cleaners, hairdresser, sales associates ug vendors/mall workers, ug uban pa.
Ang pangulo sa DMW nagkanayon nga aduna usay 2,849 ka job orders nga giaprobahan sa Migrant Workers Office (MWO) sa Kuwait alang sa mga OFW nga anaa sa lainlaing ang-ang sa pagproseso.
Giingon ni Ople nga kadaghanan sa mga order sa trabaho naa sa industriya sa pag-atiman sa panglawas, kadaghanan mga nars, ingon man sa industriya sa hotel ug restawrant, labi na ang mga waiter ug waitress.
Sa sayo pa, gianunsyo sa gobyerno sa Kuwait ang pagsuspenso sa pag-isyu sa mga visa sa mga Filipino, sa ingon nagpugong sa mga OFW nga ma-deploy sa Kuwait.
Human niini, ang gobyerno sa Pilipinas ug Kuwait nagpahigayon og duha ka adlaw nga bilateral talk bahin sa daghang mga isyo mahitungod sa OFWs.
Hinuon, natapos ang tigom nga walay klarong desisyon kon bawion sa host country ang pagsuspenso sa pag-isyu og visa batok sa mga OFW.
Uban sa gatusan ka mga OFW nga na-stranded, si DMW Undersecretary Hans Leo Cacdac miingon nga ang gobyerno andam sa pagtanyag kanila sa lainlaing matang sa tabang.
Apil na niini ang one-time financial assistance nga mokabat sa P30,000.
Matod niya nga andam usab sila nga mohatag og ayuda sa panarbaho pinaagi sa pagtabang kanila sa pagpangita og alternatibong kahigayonan sa trabaho.
“As we speak, they are profiling each and every affected worker in terms of finding out their skill sets as well as their job preferences. Of course, their approval or consent to take on another job opportunity will be taken into consideration,” matod sa official. (Samtang nagsulti kita dinhi, ilang gi-profile ang matag usa ug matag apektadong trabahante aron pangitaan ang ilang mga set sa kahanas ingon man sa ilang mga gusto sa trabaho. Siyempre, ang ilang pag-apruba o pagtugot sa pagkuha sa lain nga oportunidad sa trabaho pagaisipon.)
Matod niya nga itanyag usab ang livelihood assistance sa mga apektadong OFWs. (HDT sa SunStar Cebu)