Di mominos 84 ka mga pribadong sakyanan, apil na ang pito nga nakadawat og traffic citation, ang gi-clamp sa Cebu City Transportation Office (CCTO) tungod sa overnight parking sa mga karsada sulod sa usa ka subdivision sa Barangay Mabolo, dakbayan sa Sugbo sa Miyerkules, Hunyo 21, 2023. Ang mga karsada gipanag-iya sa Kagamhanan sa Dakbayan.
Kini human sa mga reklamo ni Eduardo Rallos Sy, residente sa Casals Village, bahin sa kanunay nga illegal parking sa mga pampublikong dalan sulod sa subdivision sa mga sulat nga gipetsahan og Agusto 20, 2022 ug Abril 1, 2023.
Ang kadalanan sulod sa village nahimo nang mga pampublikong dalan human gidonar sa Cebu City Government niadtong 1980 atol sa termino ni kanhi mayor Florentino Solon.
Ang donasyon gisuportahan sa usa ka deed of donation nga gisudlan ug gipirmahan ni Atty. Cecilio Casals ug Solon niadtong Nobiyembre 18, 1980.
Samtang, si CCTO head Raquel Arce niingon nga ang Traffic Management Committee (TMC) nipasar na sa Board Resolution No. 36-087-2023 pinetsahan og Mayo 9, 2023, nga nagtugot sa traffic office sa Dakbayan sa pagpatuman sa mga balaod nga nagdili sa illegal parking, sama sa City Ordinance Nos. 356 o Towing of illegally-parked vehicles, 801 Traffic Code of the City of Cebu ug 1664 Clamping of illegally-parked vehicles.
Gihisgutan usab sa resolusyon nga pinaagi sa usa ka endorsement letter nga pinetsahan og Nobiyembre 7, 2023, ang kadalanan sulod sa barangay gihimong mga pampublikong dalan, sumala sa abogado nga si Kent Francesco Jongoy, pangulo sa CCTO legal and investigation division.
Sa samang endorsement letter, ang legal nga departamento sa CCTO niingon nga “it is entirely within the authority of the CCTO to enforce all the aforementioned traffic ordinance.” (AML)