Siyam ka mga drayber ang nagpositibo sa confirmatory test sa Philippine Drug Enforcement Agency (PDEA) 7 human sa gihimo nga kinalit nga drug test sa North ug South Bus Terminals niadtong Marso 30, 2026.
Suma ni Leia Alcantara, information officer sa PDEA 7, ang maong mga drayber nga nasutang nigamit og shabu i-endorse ngadto sa ilang tagsa-tagsa ka Local Government Unit (LGU) alang sa gikinahanglang assessment.
Samtang ang ilang mga lisensya giduso na ngadto sa Land Transportation Office (LTO) 7 alang sa revocation.
Hugot ang baruganan ni LTO 7 Director Wendel Dinglasan nga walay second chance alang sa mga drayber nga tiggamitan og ilegal nga drugas.
Base sa datos sa PDEA 7, ang siyam nga nagpositibo naglangkob sa 4 ka taxi driver ug 5 ka bus driver.
Gibutyag ni PDEA 7 Director Joel Plaza nga mahimong ipaubos sa drug rehabilitation ang maong mga drayber base sa resulta sa assessment sa LGU diin sila nagpuyo.
Gipasabot niya nga sa Dakbayan sa Sugbo, adunay mga programa ang kagamhanan sama sa facility-based ug community-based rehabilitation aron matabangan ang mga drug user nga makabalik sa normal nilang kinabuhi.
“Ang rehabilitasyon moabot human sa assessment, kay duna man tay facility-based nga rehab ug duna usab community-based o general intervention,” pasabot ni Plaza.
Aron maseguro ang kaluwasan sa mga sumasakay ug aron hingpit nga mawagtang ang mga drug user sa han-ay sa mga drayber, gitinguha ni Plaza nga himuong regular ang Oplan Harabas.