ALBUERA, Leyte - Presidente sa Association of Barangay Councils (ABC) ning lungsod girakrakan, apan ni-survive alas 8:20 sa buntag, Lunes, Pebrero 18, 2019.
Ang pagpamusil nahitabo sa national highway sakop sa Barangay Cambalading ning lungsod. Giila ang biktima nga si Alberto Sumaljag, 60, kapitan sa Barangay Benolho.
Matod sa Police Regional Office (PRO) 8, nagsakay sa iyang awto si Sumalijag aron unta motambong sa ilang regular session.
Gisundan siya sa mga gunman nga nagsakay og gray sedan type nga sakyanan.
Pag-abot sa Cambalading, gisugdan siya sa pagpamusil.
Daghang buslot agi sa bala ang sakyanan ni Sumaljag, apan samad ra sa abaga ra ang iyang naangkon.
Luwas ra siya ug naa sa kustodiya sa Albuera Police Station.
Padayon ang follow up operation sa kapulisan aron sa pagdakop sa mga responsable.
Wa pa mahibaw-i ang motibo sa pagpamusil, apan padayon ang imbestigasyon sa hitabo.