Agalon ‘gipatay’ sa iro

Agalon ‘gipatay’ sa iro

Agalon napalgang patay na nga dunay daghang mga pinaakan sa iro ug ubang garas sa lawas sulod sa pansayan alas 7 sa buntag sa Huwebes, Septiyembre 28, 2023 sa Sitio Molila, Barangay Lawaan 1, dakbayan sa Talisay.

Ang biktima mao si George Mayol, 63, ulitawo, nagpuyo sa nahisgutang lugar, baho na nga napalgan sa iyang mga silingan, dunay daghang mga samad pinaakan sa iro.

Dugang sa mga silingan, nawataswatas usab ang short pants sa biktima nga sama sa gitabangan og bugno sa iyang lima ka binuhi nga mga iro.

Si Winston Empleo, usa sa mga silingan nga nahinabi sa sib­­yaana’ng dySS Super Radyo Cebu, nagkanayon nga Lunes pa, Septiyembre 25, 2023, nila ka­­tapusan nga nakita ang biktima.

Matod ni Empleo, si Mayol matag adlaw mogawas sa gipuy-an ug manawag kanila aron mag­patabang sa pagpanglawog sa iyang mga binuhi’ng kanding.

Tungod sa kabalaka nga wala na nila kini makit-i ang biktima, i­­lang gisusi sa gipuy-ang compound ug nasuta nga patay na kini.

“Tan-aw namo siya man, patay na naay agi samad pina­akan sa iro. Gibugno gyud ni siya kay nahitabo naman ni sa una,” dugang ni Empleo.

Si Empleo nibutyag nga niadtong Hulyo 2022, si Mayol giunay usab sa pag-ataki sa iyang binuhi’ng iro.

Samtang, si Dina Reponte, usa sa mga higala ni Mayol, nitug-an nga nakaangkon og samad pinaakan sa bukton ug baba si Mayol niadtong Hul­yo 2022 ug naospital tungod sa grabing mga samad nga naangkon human unaya og bugno sa usa sa iyang mga iro.

Sumala pa, ang biktima nakaangkon og 56 ka mga tahi sa baba ug ubang parte sa lawas.

“Kanang itom nga iro maoy seloso kaayo kay ang biktima mohagwa sa mga puti, bugnuon ang amo,” dugang ni Reponte.

Ang itom nga iro mixed breed sa German Shepherd ug Doberman ug ginganlan og “Spike.” Siya dunay laing mga iro nga brown ug upat ka mga puti apan wa masayri ang ilang breed.

Si Rodrigo Mayol, 61, mang­hod, nitug-an nga dugay na niya nga gipasidan-an ang iyang maguwang nga dili na mamuhi sa maong klasing iro kay mangunay og agalon.

Apan, dason sa manghod, wala kini mopatuo ug mipadayon sa pagpamuhi niini.

Si Police Lt. Col. Wayne Magbanua, hepe sa Talisay City Police Station nga nahinabi sa mga tigbalita, niingon nga nisugyot siya sa kabanay sa biktima nga ipaubos sa autopsy ang lawas niini aron maseguro ang hinungdan sa iyang kamatayon.

Apan, matod ni Magbanua, ang banay nisalikway sa sugyot kay kombinsido sila nga na­ma­tay kini human giataki sa iro.

Samtang, ang mga iro gipangdakop na sa awtoridad ug gibutang sa dog pound sa Talisay City. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph