Ang Bureau of Customs (BOC) nipasaka og kasong agricultural smuggling batok sa mga importer sa 202,000 ka sako sa imported nga bugas humay nga napalgan atol sa raid sa tulo ka bodega sa Bulacan niadtong Agusto.
Sa media forum niadtong Sabado, Septiyembre 30, 2023, ang acting director sa BOC Legal Service nga si Attorney William Balayo niingon nga upat ka kaso, diin tulo alang sa economic sabotage, ang gipasaka batok sa upat ka rice importers.
Matod niya nga usa ka kaso ang wala makaabot sa P10-million threshold ug nahimong kalapasan sa Customs Modernization and Tariff Act (CMTA) bisan og ubos usab kini sa smuggling sa produkto sa agrikultura, partikular sa bugas.
Ang nahisgutang mga pasilidad nga gi-raid mao ang Great Harvest Rice Mill Warehouse, San Pedro Warehouse, ug FS Rice Mill Warehouse nga nahimutang sulod sa Intercity Industrial Complex (IIC) sa Barangay San Juan, Balagtas, Bulacan.
Ang nadiskubre nga mga sinako nga bugas nga giingong gikan sa Vietnam, Cambodia ug Thailand nagkantidad og P505 milyunes.
Samtang, si Marlon Agaceta, chief of staff sa Customs Commissioner, niingon nga adunay upat ka pending letter of authority (LOA) nga gipatuman batok sa upat ka bodega—ang Gold Rush Rice Mill ug laing bodega usab sa IIC sa lungsod sa Balagtas ug ang JJS Rice Mill ug Gold Rush Rice Mill 2 pulos sa Wakas, Bocaue, Bulacan.
Ubos sa CMTA, ang mga importer gihatagan og 15 ka adlaw sa pagpresentar og pruweba sa pagbayad sa mga katungdanan ug buhis pinaagi sa mga pagdungog sa dili pa masakmit ang mga imported nga butang kon adunay kalapasan sa habig sa importer.
Ang BOC niingon nga padayon pa ang pagpasaka og kaso batok sa mga smuggler sa Zamboanga City diin kapin sa 42,000 ka sako sa smuggled rice ang nakumpiska nga sa katapusan gidonar ngadto sa Department of Social Welfare and Development (DSWD).
Ang sunodsunod nga operasyon nga gihimo sa BOC nisunod sa mando ni Presidente Ferdinand “Bongbong” Marcos Jr. nga palig-unon ang ilang paningkamot batok sa smuggling ug hoarding sa bugas nga maoy gibasol sa pagsaka sa presyo niini.
Kini usab ang nakaaghat kang Marcos nga magbutang og mandatory price cap sa regular-milled rice nga P41.00 matag kilo samtang P45 matag kilo sa well-milled rice. /Sunstar Philippines