Ang pag-abli og tugpahanan sa abyon sa lungsod sa Medellin mopapaspas sa paglambo sa ekonomiya sa amihanan sa lalawigan sa Sugbo.
Si Giles Anthony Villamor, municipal planning and development coordinator sa Medellin nga nahinabi sa SunStar Cebu, nipasabot nga ang tugpahanan makadani og dugang mga institusyon nga magtukod og flying schools sa dapit.
Matod niya, sa pagkakaron, adunay usa ka aviation educational institution sa dapit nga extension campus sa state-run Philippine State College of Aeronautics Mactan sa Barangay Curva, lungsod sa Medellin.
“We can’t even compete with Mactan [Cebu International Airport Authority (MCIAA)], the only thing we have to do is, number one, cater there in Medellin is the flying schools. We understand the air traffic in Mactan is getting worse,” matod niya sa Biyernes, Agusto 11, 2023.
Dugang ni Villamor nga bisan ang mga eskwelahan sa aviation sa dakbayan sa Lapu-Lapu adunay katakus sa pagtudlo sa mga teyoriya sa mga estudyante niini, siya niingon nga naglisod sila sa pagpatuman sa hands-on nga pagbansay tungod sa grabe nga trapiko sa kahanginan sa Lapu-Lapu.
Ang coordinator niingon nga ang mga tinun-an sa aviation gikan sa Mactan-based schools kasagarang mopahigayon sa ilang practice flights sa Bohol, silingang probinsya sa Sugbo, ug sa Ormoc City sa Leyte.
Si Villamor niingon nga ang tugpahanan, mahiluna sa mokabat sa 35 ka ektaryang yuta, anaa sa kinapusoran sa dili madugay tukoron nga special economic zone sa Medellin nga magsangkad sa mga barangay sa Caputatan Sur ug Canhabagat.
Matod niya, ang pagtukod og tugpahanan makahatag og kaayohan sa pag-uswag sa 538 ka ektarya nga Northern Cebu Economic Zone, ilabina nga makahatag og kasayon sa mga locator ug investors nga mobiyahe.
Gidugang ni Villamor sa report sa SunStar niadtong Agusto 17, ang Port of Kawit sa Barangay Kawit, giplanohan nga mopailawom sa P110 milyunes nga expansion project aron kini maka-akomodar og dugang mga excursion ug mapadali ang pagdala sa ani niini ngadto sa silingang isla sa Negros.
Sa pagkakaron, usa lang ka shipping line ang nag-operate sa pantalan, nga molatas sa rota sa Kawit-Santa Fe nga adunay duha ka giplanong biyahe kada adlaw.
Samtang ang mga lokal nga magtanom og tubo sa Medellin kinahanglang mobalhin sa ilang mga ani sa pantalan sa Tabuelan aron kini madala ngadto sa mga milling firm sa Isla sa Negros. Ang Tabuelan duha ka lungsod sa habagatan sa Medellin sa kasadpang baybayon sa Sugbo nga nag-atubang sa Isla sa Negros.
TURISMO
Dugang pa niya nga ang bag-ong tugpahanan, dili sama sa MCIAA, wala maghunahuna nga mo-cater sa commercial international flights, kondili domestic flights lang nga makatabang sa transportasyon sa mga bisitang turista.
Sigon ni Villamor nga ilang napanglantawan ang pag-operate sa domestic flights sama sa aerodrome sa Bantayan Airport sa lungsod sa Santa Fe sa Bantayan Island, ug sa Camotes Airport sa lungsod sa San Francisco sa Camotes Islands.
Iyang namatikdan nga sa higayon nga hingpit na kining magamit, ang mga biyahe dili lamang makabenepisyo sa mamauli nga mga lokal, apan makatabang usab sa pagdala og dugang mga bisita ug bisita sa mga destinasyon sa mga turista sa amihanang Sugbo. (KJF)