Nipasaka og kasong cyber libel sila si Atty. Regal Oliva ug Michelle Mendez-Palmares alang sa Integrated Bar of the Philippines (IBP) - Cebu City chapter batok sa usa ka pribadong indibiduwal tungod sa nag-viral nga Facebook post sa miaging semana.
Kini nag-akusar sa kahugpongan sa mga abogado nga wala mo-settle sa ilang bayranan sa giabangan nga sound ug lights atol usa ka socio-cultural show sa miaging tuig.
Sila si Oliva ug Mendez-Palmares nipasaka og pormal nga reklamo sa Cebu City Prosecutor’s Office sa Department of Justice - Cebu sa Lunes, Oktubre 16, 2023, bahin sa online post sa usa ka ‘Gi Gan Selle’ o naila nga Giselle Gantuangco Alberca sa tinuod nga kinabuhi nga giiingong nihimo og ‘libelous’ nga post batok sa IBP Cebu City chapter
Si Oliva nitug-an sa mga tigbalita nga una nang nahusay ang isyo bahin ni Alberca nga ni-post og apology statement ngadto sa IBP Cebu City chapter, apan bag-o lang kining gi-delete nga way igong rason hinungdan nga ipadayon nila ang pormal nga reklamo.
Apan, si Giselle Gantuangco Alberca, pinaagi sa iyang bana nga si Isidro Albera, nitug-an sa SunStar Cebu nga nakurat sila sa pagsang-at sa reklamo ug labot sa pagtangtang sa pasaylo.
Matod ni Isidro nga gihimo kini nga may pagtugot ni Oliva subay sa hangyo sa tag-iya sa MDF Production, ang aktuwal nga organizer sa kalihukan, nga dili na maghisgot sa isyo.
VIRAL POST
Ang gi-delete na karon nga Facebook post sa “Gi Gan Selle,” niadtong Sabado, Oktubre 14, 2023 nag-ingon nga ang mga nag-organisar sa “Festivals of Festivals,” usa ka socio-cultural event sa IBP-Cebu City chapter niadtong Oktubre 2022 wala mobayad sa ilang financial dues sa Sounds, Lights ug LED Services.
Gihimakak ni Oliva ang maong pangangkon ug nitug-an sa mga tigbalita niadtong Lunes nga ang tanang mga obligasyon sa panalapi kalabot sa Joint Regional Convention sa IBP alang sa Eastern ug Western Visayas Regions nga gipahigayon niadtong Oktubre 13 ug 14, 2022 sa usa ka hotel sa dakbayan sa Sugbo naareglo.
Siya niingon nga ang partikular nga post nakadaot sa kinaiya, integridad, ug reputasyon sa organisasyon sa abogado, si Oliva misulti sa mga tigbalita niadtong Lunes.
Sa imbestigasyon, ang tag-iya sa Alberca Sounds and Lights Rental nga nakabase sa Carcar City maoy tag-iya sa audio-video ug lights equipment atol sa social night event sa IBP sa miaging tuig.
Giklaro ni Oliva nga gikontrata sa IBP-Cebu City Chapter ang MDF Production isip overall coordinator sa maong kalihukan, nga nagpasabot nga ang tanang suppliers gipaagi kanila, ug ang IBP Cebu City isip main host sa maong kalihukan mibayad kanila sa usa ka lot.
Siya midugang nga sila mibayad sa tibuok P400,000 ngadto sa MDF Production alang sa maong partikular nga serbisyo, usa ka adlaw sa wala pa ang petsa sa kalihukan.
Dugang ni Oliva nga nangayo sila og P5 milyunes isip bayad sa kadaot ug laing P500,000 nga bayad sa abogado tungod sa maong viral post.
TUBAG
Sa linaing pakighinabi, giklaro ni Isidro niadtong Lunes nga si Margarita Frasco, tag-iya sa MDF production, nihangyo kanila nga i-delete ang post nga nag-viral ug ingon man ang apology statement aron masulbad ang isyo.
Siya ug ang iyang asawa nipadayag sa ilang pagpangayo og pasaylo sa mga opisyal ug sakop sa IBP Cebu City chapter tungod sa ilang viral post ug giklaro nga ang post sa iyang asawa gitumong ngadto sa overall coordinator sa kalihukan ug dili sa IBP Cebu City.
Matod ni Isidro nga sa wala pa nag-viral ang post sa iyang asawa, wala pa ma-settle sa MDF production ang ilang accounts kanila, human nakontrata ang ilang serbisyo sa paghatag sa mga ekipo alang sa kalihukan sa IBP Cebu City chapter sa miaging tuig.
