Wala makaagwanta sa nadawat nga kinumo ang 73-anyos na amahan human siya gidabudabuhan og kulata sa iyang anak niadtong gabii sa Lunes, Marso 30, 2026, sa Sityo Binalabag, Barangay Lanao, Lungsod sa Dalaguete.
Ang biktima giila nga si Ignacio Amaba, mag-uuma nga namatay sa tambalanan human sa pipila ka oras nga gidala.
Samtang ang suspek iya ra sab nga anak nga si Renato Amaba, 44, minyo, mag-uuma, nagpuyo ra sab sa naasoy’ng dapit kinsa napriso sa Dalaguete Police Station samtang mag-atubang og kasong parricide.
Si Police Major Vincent Zozobrado, nitug-an nga base sa pamahayag sa saksi nga silingan sa pamilya’ng Amaba nga sa maong oras nadunggan ang kaguliyang.
Ang asawa sa namatay nga si Veronica ang nangayo og tabang sa mga silingan sa dihang ang suspek nagpunay og sumbag sa ulo sa iyang amahan sa makadaghang higayon.
Ang biktima nga gilupig sa kusog ang wala makasagang sa kinumo sa iyang anak.
Ang saksi nisuway og pugong sa suspek apan wala siya mopatuo ug padayon sa iyang pagpangulata, hangtod nga nawad-an og panimuot ang biktima.
Nagkanayon si Zozobrado nga adunay gilalisan ang amahan ug anak nga pulos hubog hangtod nga nisangpot sa pagpangulata.
Nadala pa ang biktima sa Argao District Hospital apan wala madugay nabugtoan siya sa kinabuhi.