Dili mominos 3,000 ka ambulant vendors ang nagprotesta sa Plaza Sugbu atubangan sa Cebu City Hall sa Miyerkules, Mayo 14, 2023, nga naghangyo sa local chief executive nga bawion ang no entry schemes sa mga entry point.
Sila ang mga apektado sa “pedestrianized Carbon market” scheme nga nagbutang og no entry signs sa kadalanan sa M.C. Briones, F. Calderon, ug Manalili gikan sa alas 6:00 sa gabii hangtod alas 6:00 sa buntag diin gidid-an ang tanang sakyanan nga makasulod sa Carbon night market area.
Si Rev. Raymundo Gelloagan sa United Church of Christ in the Philippines namulong sa protesta, niingon nga walay bisan usa nga mabiyaan sa kalamboan ug kauswagan sa dakbayan.
“Importante sa nga tanan mao nga matubag ang kahimtang sa katawhan nga walay biniyaan, ang hustisya ipatuman..,” matod ni Gelloagan.
Ang Carbonhanong Alyansa alang sa Reporma ug Bahandianong Ogma sa mga Nanginabuhi (CARBON) nagkanayon nga ang bag-ong scheme naghatag og dugang kalisdanan sa mamaligyaay.
Ang iyang mga tolda gipresyohan og P3,500 kon cash ug P4,500 kon installment, sa ibabaw niini, ang mga vendor mobayad og P20 sa United Multi-Sectoral Coordinating Council sa Cebu City, P20 sa barangay, P20 sa City Government, P20 sa ilang Kapulungan para sa maintenance, ug average nga P20 ngadto sa P40 para sa ilang konsumo sa kuryente kada adlaw.
Nikabat sa 900 ka vendors gikan sa Carbon ningpirma sa petisyon nga gisumite ngadto kang Cebu City Councilor Nestor Archival ug sa Cebu City Council niadtong Miyerkules, Hunyo 14.
Si Cebu City Vice Mayor Raymond Garcia, nangulo sa regular session sa Miyerkules, Hunyo 14, sa Legislative Building, niingon nga wa siya kahibalo sa protesta nga nahitabo sa gawas samtang nagpadayon ang sisyon.
“I think it just need to be further discussed and deliberated upon sa atong mga kadagkuan sa gobyerno sa atong City Government, basta kami diri sa Council maminaw mi nila, ug kon naay interventions nga gikinahanglan, among buhaton,” matod ni Garcia.