GIMANDOAN a Provincial Disaster Risk Reduction and Management Office (PDRRMO) ang tanang lokal DRRMO nga padayong hugot nga magbantay sa nasinati nga di maayong panahon tungod sa hanging Amihan.
Gipahibalo ni Wilson Ramos, interim officer sa PDRRMO nga nakatala ang probinsya og usa ka insidente sa storm surge sa Barangay Luyang, lungsod sa Carmen diin usa ka balay nga gipanag-iya ni Lilia Remoto ang naguba sa hapak sa balod, alas 12 sa tungang gabii sa Miyekules, Disyembre 8.
Hinuon, nakabakwit na ang pamilya ni Remoto.
Gawas niini, unang gikataho usab ang pagsuspenso sa biyahe sa pipila ka mga pampublikong sakyanang pangdagat sa dakbayan sa Danao, lungsod sa Medellin ug San Remigio tungod sa kusog nga hangin ug dagkong bawod.
Sa Daanbantayan, gisuspenso ni Mayor Sun Shimura ang klase lungsod tungod sa di maayong panahon.
Sa siyudad sa Bogo, ang lokal nga kagamhanan nipahimangno sa ilang mga residente nga kinahanglan alerto, human nga naapil sa orange warning level category ang dakbayan kagahapong adlawa, Disyembre 9.
Sumala sa PDRRMO, ang orange level nagpasabot, nga anaa sa 75,000-150,000 baril nga gidaghanon nga tubig uwan ang ibundak matag usa kilometro kwadrado sa matag takna.
Matod ni Ramos nga subay sa gihimong monitoring gipanglantawan nga magsigi pa ang pag-uwan diin may posibilidad nga ang kasamtangang low pressure area (LPA) mahimong bagyo ug gipaabot nga mo-landfall sa sunod semana.
Hinuon, gipasabot niya nga posible usab kini matunaw sa mosunod pang mga adlaw.
Tungod sa nasinati nga hanging amihan, gimandoan ang tanang sakop sa LDRRMO sa pagsusi sa mga lugar nga risgo sa pagbaha, landslide o pagdahili sa yuta ug mohimo og early warning o preventive measures.
Giawhag ang mga residente sa probinsya nga mobakwit o motawag sa disaster offices kon makita nga dili na maayo ang kahimtang sa nahimutangan o magrisgo sa kinabuhi.
Samtang, si Alfredo Quiblat Jr., hepe sa Philippine Atmospheric, Geophysical and Astronomical Services Administration (Pagasa) Visayas, nibutyag sa Sunstar Cebu nga ang Shear Line o Tail End of Frontal System ang hinungdan sa pagporma sa panganod nga nagdala og uwan.
“This is a meeting of two winds from different direction with different temperatures,” matod ni Quiblat sa SunStar Cebu.
Sumala ni Quiblat, ang panag-abot sa bugnaw nga hangin gikan sa amihanan-silangan o gitawag nga amihan ug mainit nga hangin gikan sa silangan maoy nagpasulabi sa sistema nga nakaapekto sa Central ug Eastern Visayas Regions.
Hinuon, dugang ni Quiblat, gibanabana nga moarang-arang ang panahon sa Sabado, Disyembre 11.
Si Quiblat nagkanayon nga ilang na-monitor ang amihan nga dunay kalit nga paghuros sa hangin sa gikusgon nga 30-50 kilometers per hour.
“Delikado nang gagmay nga sakyanang pang dagat kay mag mugna og moderate to rough sea conditions,” pasidaan ni Quiblat. (ANV, IRT)