Giatsa sa anak ang iyang amahan nga 50 anyos sa Sitio Upper Site, Barangay Pit-os, dakbayan sa Sugbo niadtong Biyernes, Hulyo 21, 2023, pasado alas 6 sa gabii.
Ang biktima nga daling gidala sa Vicente Sotto Memorial Medical Center apan namatay giila nga si Renel Rogon Layson, nagpuyo usab sa naasoy nga dapit.
Siya nakaangkon og samad sa likod human atsaha sa iyang anak nga si Renan Jay Layson, 21.
Matod ni Police Major Janelito Marquez, hepe sa Talamban Police Station, pagka alas 7:50 sa Sabado sa buntag, Hulyo 22, 2023, nakabsan sa kinabuhi ang biktima.
Sa imbestigasyon sa Talamban Police Station nasuta nga samtang nagtan-aw og telebisyon ang amahan, kalit nga giatsa sa suspek nga gihulagway ni Marquez nga kalit lang nga nasuko nunot sa pagduda nga giabuso sa iyang amahan ang iyang igsuon.
Bag-o lang nakagawas sa Abuyog Penal Farm sa Leyte si Renan Jay sa kasong frustrated murder apan nausab na ang batasan niini sa dihang nabalik sa ilang balay niadtong Hunyo.
Nadakpan hinuon dayon sa mga niresponding polis ang suspek ug sa Miyekules, Hulyo 26, 2023, gipasaka na ang kasong parricide.
Sa pakighinabi sa Superbalita Cebu sa Miyerkules, giangkon sa suspek ang krimen, apan matod niya nga iya kadtong nabuhat tungod kay giabusohan sa iyang amahan ang iyang igsuon ug kulatahon pa.