MAS gihingusgan sa City Health Office (CHO) sa Dakbayan sa Talisay ang anti-dengue task force tungod sa nakapaalarma nga pagtaas sa gidaghanon sa kaso sa dengue ning tuiga kumpara niadtong 2018.
Nitaas og 63 porsiyento ang gidaghanon sa kaso sa dengue gikan Enero hangtud Agusto 3 tuig 2019 kon ikompara sa susama nga panahon sa niaging tuig.
Base sa datos, aduna'y 236 ka mga kaso ning tuiga ikompara sa 145 sa niaging tuig.
Hinuon, nius-os ang kaso sa namatay gikan sa upat niadtong 2019 ngadto sa usa sa 2019, nga nahitabo niadtong Marso.
Nipadayag og kabalaka si Doctor Lino Alanzado, city health officer sa Dakbayan sa Talisay, kay aduna'y pipila nga wala nagpakabana alang sa kalimpyo sa tagsa-tagsa nila nga tugkaran.
Kanunay nga niphinundom ang CHO sa 4s batok dengue: "Search and Destroy" sa mosquito-breeding sites, "Self Protection Measures", "Seek Early Consultation" o ang pagpakonsulta dayon kon nakasinati na og sintomas sa sakit, ug "Support Fogging and Spraying" sa mga giilang hotspot area sa mga kaso sa dengue.
Giila ang Barangay Cansojong, Tabunok ug Poblacion isip top 3 nga barangay nga aduna'y daghang kaso sa dengue.
Matud ni Alanzado nga wala magkulang ang CHO sa pagpahinumdom apan gikinahanglan nila ang aktibong panginlabot sa publiko.
Gitug-an ni Alanzado nga nagsugod og saka ang kaso sa dengue sa pagsugod sa ting-uwan niadtong Hunyo.
"Based on sa national, na-declare naman gyud nila nga national epidemic pero pasalamat lang mi nga bisan nitaas ang kaso sa dengue, isa ra ang mortality. Ang among gikakulbaan kay grabe naman gyud ang kaso sa dengue 'nya rainy season pa gyud. Mosaka unya ang among mortality," gitug-an ni Alanzado sa Superbalita Cebu.
Tungod kanunay pa ang pag-uwan, mas nihingusog ang CHO sa ilang pagpahinumdom sa publiko batok sa paglikay sa sakit nga dengue, diin bata ang kasagaran nga bikitima. (Superbalita Cebu)
