Andam na ang kapulisan sa paghatag og seguridad sa upat ka adlaw nga Bar exams nga magsugod karong Miyerkules, Nobiyembre 9, 2022 .
Hugot nga ipatuman ang Anti-Noise Ordinance sa palibot sa duha ka mga unibersidad diin ipahigayon ang Bar exams.
Matod ni Police Brigadier General Roderick Augustus Alba, direktor sa Police Regional Office (PRO) 7, posibling dunay himuon nga re-routing sa mga sakyanan nga moagi sa tugkaran sa University of San Carlos (USC) Main Campus ug University of Cebu (UC) Banilad Campus.
Gitinguha nila nga makab-ot ang zero crime sa upat ka adlaw nga dakong kalihukan nga may kalabotan sa Bar exams kini pinaagi sa pagtinabangay sa komunidad ug kapulisan.
Dunay ihatag nga augmentation ang PRO-7 sa Cebu City Police Office nga maoy mohatag sa siguridad.
“All systems go for Cebu City Police Office (CCPO) and augmentation from other police units to secure the two universities in the city which will serve as venues for the 2022 bar examinations,” matud ni Alba.
Si Police Lieutenant Colonel Wilbert Parilla, deputy city director for administration sa CCPO, nagkanayon nga nakahan-ay na ang security plan.
Sama sa miaging Bar exams, estrikto nila nga ipatuman ang ordinansa sa Dakbayan, ang anti-noise ordinance gikan sa alas 5:00 sa buntag hangtod sa alas 7:00 sa gabii.
Hugot nga idili ang videoke, pagpatukar sa lanog nga sound system lakip na ang pagpatingog sa mga busina sa mga sakyanan sa duol sa duha ka tunghaan aron dili matugaw ang mokuha sa exams.
“Along the street sa UC diha sa Banilad ginadili nato ang pagsaba-saba to include ang mga sakyanan, bawal magsirbato and then, all ordinances related to anti-noise ato nang i-implement like videoke, parties within the area so ato nang ipatuman,” matud ni Parilla.
Kon dunay mosupak niining maong ordinansa, isyuhan kini og citation gikan sa Kagamhanan sa Dakbayan sa Sugbo nga dunay multa.
Tungod niini, nanawagan ang kapulisan ngadto sa publiko nga tumanon lang ang pahimangno aron dili maapektohan ang pag kuha sa eksaminasyon sa mga nagtinguha nga mahimo nga abogado.
Wala pa hinuon makadawat og hulga ang kapulisan nga dunay mohimo og dautan sa maong adlaw apan bisan pa man niini isaka sa CCPO ang ilang alert status aron masiguro ang kaluwasan sa mga mokuha sa Bar exams. (AYB)