Sa dili madugay, matagamtam na sa mga Sugbuanon ang kasayon sa electronic financial transactions pinaagi sa Cebu Smart City Application nga modawat sa mga bayranan sa city bills and dues, remittance, cardless withdrawals ug deposits, ug bisan bank transfers.
Ang kabag-ohan nga gipaila sa Traxion Tech nagsumpay sa mga bahin sa e-wallet nga gilakip sa mga serbisyo sa gobiyerno.
Matod ni Mike Cubos, presidente sa Overcode Technologies sa Traxion Tech, ang Dakbayan sa Sugbo maoy usa sa mga unang siyudad sa nasod nga aduna niini nga sistema sa higayon nga pormal na kining ilusad.
Si Cubos, uban ni Ann Cuisia sa Traxion Tech, nipaila sa Cebu Smart City App Teller Machine ngadto kang Cebu City Mayor Michael Rama sa Fort San Pedro sa Lunes, Hunyo 12, 2023.
Matod ni Cubos nga gihimo nila kini sa ika-12 tungod kay kini ang Independence Day sa nasod, ug ila usab nga gilantaw nga kini nga kabag-ohan mahimong simbolo sa pagkagawasnon gikan sa tradisyonal nga mga pamaagi sa pagbayad ug mga sistema, nga nagtugot sa daghang mga tawo nga maka-access sa e-banking.