Gisubli ni Dr. Gerardo Aquino, hepe sa Vicente Sotto Memorial Medical Center (VSMMC), nga tag usa lang ang gitugot nga bantay sa matag pasyente nga gitugtang dunay makabantay tungod sa kakuwang sa lugar kon asa sila makapasilong.
Dugang niya nga kini gibuhat usab sa hospital aron kalikayan ang pagtapok sa mga bisita nga mosangko sa pagtakdanay sa sakit.
Gipasabot ni Aquino nga sa kasamtangan nagpadayon ang pagpatuman sa mando nga “no-watcher-and-visitor policy” sa hospital sukad pa sa Hunyo 9, 2020 tungod sa pagsulbong sa mga kaso sa coronavirus disease 2019 (Covid-19).
Alang sa mga pasyente nga nagkinahanglan og agak sama sa mga senior citizen, minors ug persons with disability (PWD), gitugot ang pagkuyog sa usa ka bantay.
Apan sa pagsusi, duna gihapoy mga pasyente nga magdala og bantay nga mosobra sa gitugot.
Pipila gihapon kanila ang makita sa gawas sa hospital nga giingong maglingkod o sa maong lugar na matulog.
“We allow man gud some exceptions, dili man gyud totally wala,”matod ni Aquino pinaagi sa Sugbo News, information platform sa Kapitolyo.
“Gusto man namo i-accommodate that’s why we gave exceptions. In fact, liberal na gani kaayo mi sa exceptions kay we really want to help also. Pero dili pud pwede. We ask the public to understand that we are doing this for the good of all concerned, dili lang kay dili namo gusto,” dugang ni Aquino.
Subay sa datos sa hospital sa Septiyembre 6, moabot sa 745 ka mga pasyente ang na-admit sa tambalanan. Samtang 424 usab ang natala nga gidaghanon sa mga tigbantay sa dunay special needs.
“Kon ato gud pasudlon tanan, kulang na ta daan og space... Kon i-times two na nimo ang number of watchers, moabot og 1,500, plus patients with other cases, mo-2,000 na kapin,” pagpasabot ni Aquino.
Aron masolusyonan ang tapok sa watchers, nigahin og bus ang Kagamhanan sa Siyudad sa Sugbo nga maoy kapasilongan sa mga nagbantay nga dili na makasulod sa hospital.