ASAWA sa napatay nga kanhi kapitan sa Barangay Lugo, lungsod sa Borbon, Sugbo nakaplagang patay sa Miyerkules, Septiyembre 30, ug gilubong sa usa ka katubhan sa Barangay San Miguel, siyudad sa La Carlota, Negros Occidental.
Giila si Juliet Mercader, 26, taga Lugo, pinaagi sa alahas nga nakaplagan sa lubnganan.
Si Juliet, asawa ni kanhi barangay kapitan Jinnefer Mercader, kinsa napatay sa kapulisan sa lungsod sa Murcia ug sa Police Regional Office (PRO) 6 niadtong Septiyembre 28, 2020.
Si Juliet niadto sa Negros Occidental aron unta pagkuha sa lawas sa iyang bana.
Matod sa hepe sa La Carlota City Police Station, Police Lieutenant Colonel Jonel Guadalupe, nga niadtong Septiyembre 30 sa buntag usa ka mag-uuma nakamatikod sa kinawtan sa yuta sa dihang nagtapas silag tubo.
Dali siyang nipahibawo sa mga barangay official nga mao usab ang nanawag sa police station.
Matod ni Guadalupe nga sa ilang pagsusi, ilang nadiskobrehan ang lawas sa sa usa ka babaye nga aduna nay samad sa ulo ug agtang mugna sa paghapak sa gahi nga butang.
Ila usab nga nakuha ang sapot ni Juliet ug relo niini nga naa sa duol sa gilubngan sa lawas.
Sila naduda nga gilugos unsa si Juliet sa wa pa patya ug gilubong ra usab sa dapit sa pagtuo nga way makakita sa lawas.
Gitakdang ipaubos sa autopsy ang lawas una dalhon dinhi sa Sugbo nga maoy gusto sa pamilya.
Wa usab nila wad-a ang ubang posibilidad sama sa pagtulis bisan kon adunay relo nga nakuha ang kapulisan.
MOKUHA UNTA
Si Juliet giingong miadto sa Negros Occidental aron duawon ang lawas sa iyang bana nga napatay sa mga police niadtong Septiyembre 28 sa buntag.
Si Police Brigadier General Albert Ignatius Ferro, hepe sa Police Regional Office 7, makig-alayon sa PNP Western Visayas alang sa pagsuta sa imbestigasyon.
Giawhag niya ang pamilya sa namatay nga makig-alayon sa ilang buhatan alang sa linain nga imbestigasyon nga himuon.
“If the family is asking for help, we will help them. We will just coordinate with the Police Regional Office 6 so that we will help them get justice for the victim,” matod ni Ferro.
Usa sa mga PNP official sa dakbayan sa Bacolod nga nahinabi sa Superbalita Cebu nga di lang magpahingan nagkanayon nga ang grupo ni Jinnefer maoy responsabli sa mga tulis sa siyudad.
Niadtong miaging tuig sa wa pa ang Pasko, usa ka dapit sa siyudad sa Bacolod ang gironda sa mga pulis tungod sa tawag sa telepono nga naa ang mga notadong tulisan.
Adunay pipila nga nadakpan, apan si Mercader naka ikyas uban sa iyang grupo nga supplier na usab sa ilegal nga drugas.
Niadtong Marso 5, 2019, niikyas gikan sa Medellin District Jail si Mercader ug nidiretso sa Negros Occidental aron motago