Gibalhog sa prisohan ang usa ka asawa ug iyang kabit human sila nasakpan sa akto sa sulod sa usa ka lawak sa motel sa Barangay Subangdaku, Dakbayan sa Mandaue, sayo sa buntag niadtong Martes, Marso 31, 2026.
Nasakpan ang duruha human nasundan sa reklamante nga bana, nga gitago sa pangan nga Dan, nga nisulod sa motel uban sa iyahang kabit nga kanhi kauban sa trabaho.
Ang mga suspek giila nga silang alyas Ivy, 42, minyo , asawa sa complainant ug alyas Jo, 32, minyo sab nga giingong kalambigit sa asawa.
Nangayo og police assistance ang bana ngadto sa Mandaue City Police Office (MCPO) Station 2, hinungdan nga gilusad ang operasyon ala 1:00 sa kaadlawon sa maong adlaw.
Matod ni Police Lieutenant Colonel Mercy Villaro-Kantuna, tigpamaba sa MCPO, nga gipangayuan og mga dokumento ang reklamante sa pagmatuod sa iyang legal nga relasyon sa babayeng suspek.
Human nakapakita og dokumento sama sa marriage contract, girumbo sa kapulisan ang lawak diin ni-check in ang mga suspek.
Nakig-alayon ang mga kapulisan ngadto sa management sa maong motel aron nga masulod ang kuwarto.
“The husband reported to our Police Station 2 and sought assistance because he was following his wife and her alleged partner who entered a hotel. Before conducting the operation, we required him to present documents proving that they are legally married. After he showed proof, our personnel proceeded with the operation,” matod ni Villaro-Kantuna.
Base sa imbestigasyon, nibutyag ang bana nga nagduda na siya sa iyahang asawa nga nagbinuang sa ilang kaminyuon ilabi na sa mga hugonhugon nga iyang nahibaw-an gikan sa mga silingan ug kanhi mga kauban sa trabaho kalabot sa relasyon iyang asawa ug sa iyang kabit.
Giingong nagsugod ang ilang relasyon sa dihang nagtrabaho pa sila sa usa ka kompanya.
Apan nataktak sila sa ilahang trabaho gumikan sa maong ginadiling relasyon ilabi na nga minyo sab ang kabit.
Bisan pa sa maong mga pasidaan, niadto lang Pebrero ning tuiga hingpit nga nakompirmar sa bana ang tanan, hangtod nga iya kining gisundan sa motel niadtong Martes.
Nasakpan sa akto ang duruha sa dihang gisulod ang kwarto uban sa mga polis.
Kasamtangang nagtingkagol sa selda ang duha ka suspek.
Pamahayag sa biktima nga dili niya mapasaylo ang binuhatan sa iyang asawa ug desidido nga mopasaka og kaso.
Gisuwayan og kuha ang habig sa asawa ug sa maong kabit apan nagdumili sa pagtubag sa mga pangutana.
Ang mga suspek mag-atubang og kasong Adultery (Violation of Article 333 of the Revised Penal Code).
Giandam na sa MCPO ang tanang dokumento alang sa pormal nga pagpasaka sa kaso ngadto sa korte.