Atop sa lifestyle park sa Lapu nahugno, 9 angol

Bag-ong giablihan nga Mactan Lifestyle Park sa Barangay Maribago, dakbayan sa Lapu-Lapu temporaryong gisirad-an usa lang ka adlaw human giablihan niadtong Pebrero 5, 2023, human nahugno ang atop niini nga nakaangol sa siyam ka mga tawo.

Si Mayor Junard “Ahong” Chan nimando sa temporaryong pagpasira subay sa rekomendasyon sa Lapu-Lapu City Engineering Office sa Lunes, Pebrero 6, 2023.

Si Engr. Perla Amar, pangulo sa Lapu-Lapu City Engineering Office, niingon nga ang mga tag-iya sa food park giingong niangkon nga wa pa silay nakuhang permit gikan sa City Government ilabi na sa building ug business permit.

Siya niingon nga ang mga tag-iya kinahanglang mobayad og P10,000 nga multa sa pag-operate nga walay building permit samtang nisaad usab sila nga abagahon ang galastohan sa mga nangaangol.

Siyam ka mga tawo ang gipangdala sa mga tambalanan human nakaangkon og mga samad sa dihang nahugno ang atop sa parke pasado alas 9 sa gabii niadtong Dominggo taliwa sa pagbunok sa uwan.

Si Nagiel Bañacia, pangulo sa City Disaster Risk Reduction and Management Office (CDRRMO), niingon nga ang mga nangaangol nakaangkon og mga samad sa ulo, gagmay nga mga bun-og, ug mga samad sa bukton ug liog.

Matud niya nga ang mga biktima gikatahong nalingaw sa mga pagkaon ug ilimnon sa Mactan Lifestyle Park, nga giablihan lang pipila ka oras sa wala pa ang insidente.

“Ang sentro nga bahin sa atop sa mga food park, nga ginama sa steel ug plastic sheets, nahugno human nitapok og igong gidaghanon sa tubig sa ulan, sumala sa inisyal nga imbestigasyon sa Lapu-Lapu City Rescue,” matud ni Bañacia.

“Nagpasabot nga adunay problema sa istruktura sa atop. Adunay posibling depekto sa disenyo nga kinahanglang susihon pa sa mga structural engineers sa Office of the Building Official, Justin Caballero, Team Leader sa SAR Team sa Lapu-Lapu City Rescue,” dugang niya.

Ang mga biktima daling gipangdala sa duol nga tambalanan sa mga personnel sa Maribago Rescue ug Lapu-Lapu City Rescue. (MKG)