Ang pag-panic sa mga pasahero dihang nihapak ang kusog nga hangin maoy hinungdan sa pagkatikyaob sa bangka nga pasaheroan niadtong Huwebes, Hulyo 27, 2023 sa Laguna de Bay sa lalawigan sa Rizal.
Labing minos 26 ka mga tawo ang nangamatay ug 40 ang nangaluwas, matod sa mga opisyal niadtong Biyernes, Hulyo 28.
Tungod sa ilang grabeng kalisang, sila nanagpunsisok sa usa ka habig sa bangka hinungdan nga nawad-an kini sa balanse ug naputol ang katig hinungdan sa pagkatikyaob.
Giingon sa mga opisyal sa coast guard ug kapulisan nga nagpabilin nga dili klaro kon pila ka mga tawo ang sakay sa M/B Princess Aya.
Nahitabo ang pagkalunod mga 46 metros gikan sa baybayon.
Gikan kini sa pantalan sa Binangonan paingon sa Talim, matod sa coast guard ug kapulisan.
Ang kapulisan sa lalawigan sa Rizal niingon nga nilusad dayon sila og rescue operation inabagan sa coast guard ug ubang lokal nga awtoridad, apan di mominos 26 ka tawo ang nalumos. Kap-atan ka uban ang naluwas.
“This is really a tragic event that has to be investigated,” matod ni coast guard Rear Adm. Hostillo Arturo Cornelio sa mga reporter.
Ang lantsa mokarga unta og labing taas nga 42 ka mga pasahero ug mga tripulante apan overloaded, matod ni Cornelio.
Matod niya nga susihon usab sa mga imbestigador ang mga taho nga ang mga pasahero wala magsul-ob og life vests nga gikinahanglan sa mga regulasyon sa kaluwasan. (AP)