Mga lugar sa Mindanao ug Central Visayas ang hagbunganan sa ilegal nga drugas sa usa ka ‘shabu bodegera’ nga nadakpan sa mga operatiba sa City Drug Enforcement Unit (CDEU) ug City Intelligence Unit (CIU) sa Lapu-Lapu City Police Office (LCPO) sa alas 10 sa Lunes sa gabii, Hunyo 13, 2022 sa Dakbayan sa Lapu-Lapu.
Ang buy-bust gipahigayon sa Sangi Road, Barangay Pajo sa nahisgutang siyudad. Gipangulohan ni Police Major Joey Bicoy, pangu sa CDEU, ang buy-bust operation nga niresulta sa pagkasikop ni Eleonor Tagra Quistadio, 43, taga Barangay Quezon, lungsod sa Tagbina, Surigao Del Sur.
Nasakmit sa mga operatiba ang gidudahang shabu nga motimbang og upat ka kilo nga dunay street drug price (SDP) nga P27.2 milyones. Si Police Lieutenant Colonel Jul Muhammad Jamiri, kinsa maoy pangu sa CIU, nitug-an sa Superbalita Cebu nga ang iyang mga sakop naniid una kang Quistadio sa wa pa ang buy-bust.
Matud ni Jamiri, grupo ni Police Lieutenant Noah Añana maoy naniid sa ginang, apan gihulagway nga grabe ka idlas si Quistadio kay nagbalhinbalhin sa dapit nga ilang kasabutan ug duna say gikanselar.
Dugang ni Jamiri nga subay sa ilang inisiyal nga nakuha nga kasayuran, lapad ang operasiyon ni Quistadio kay gawas sa Central Visayas, abot usab siya sa Mindanao. Ang LCPO padayon pa nga manguha og kasayuran gikan sa suspek, kon kinsa ang iyang agawon ug pamaagi sa paghatud sa drugas ngadto na sa iyang mga suki.
“All are possible about sa iyang ilegal nga transaksiyon. Posibleng diri niya gikuha ang item nya kon naa siya sa Visayas or ug naa sab siya sa Mindanao didto pud niya kuhaon. Mao ni atong sutaon karon kon unsay pamaagi kay as for now bag-o paman siya nadakpan,” matod ni Jamiri.
Gihulagway ni Jamiri nga si Quistadio makonsiderar nga bodegera ug courier samtang nag-dispose pud kini apan mga dinagko lang ang order niini. Samtang gidayeg sa pangu sa kapulisan sa Central Visayas ang dakong kalampusan nga nahimo sa kapulisan sa dakbayan sa Lapu-Lapu.
Sa gipaabot nga pamahayag ni Police Regional Office (PRO) 7 Director Police Brigadier General Roque Eduardo Vega nga ang kampanya sa pagbatok sa ilegal nga drugas walay katapusan dinhi sa Central Visayas.
Nasuta nga gawas sa lungsod sa Tagbina, si Quistadio duna usay address sa lungsod sa Lianga, probinsiya sa Surigao Del Sur kon diin nailhan siya nga “Madam Aya”.
Gikonsiderar sa PRO 7 nga ang pagkadakop ni Quistadio maoy labing dako karong buwana.
Kasong kalapasan sa Republic Act (RA) 9165 kun Comprehensive Dangerous Drugs Act of 2002 ang atubangon ni Quistadio.