NANAWAGAN ang mayor sa mga taga Mandaue nga mogamit na sa “Guardian Volunteer” sa ilang mga mobile phones harun mapahimuslan na nila ang dinaliang pag-abag kung aduna’y emerhensiya, ilabi na kung may katalagman.
Giawhag sab ni Mayor Luigi Quisumbing ang mga doktor ug paramedics nga namuyo sa Mandaue, ug ingon man sa mga nabansay sa pagpangluwas ug pamombero, nga magpalista isip “Guardian Responder” sa buhatan sa Bantay Mandaue.
Kini naugmad human makatapos ang duha ka grupo gikan sa Bantay Mandaue ang ilang pagbansay-bansay isip mga call taker ug dispatcher nga gipahigayon sa SugboTek, Inc., ang miugmad sa mobile-based platform alang sa emergency response.
I-download lang sa mga naggamit og Android phone ang app gikan sa Google Play, ug AppStore sa naggamit og iPhone, ug moparehistro sa sistema, mibutyag si Cloyd B. Dedicatoria, SugboTek managing director.
Napa-uswag sa Mandaue ang katakos niini nga motubag sa mga emerhensiya pinaagi sa pagsagop sa Guardian nga magamit gilayon sa publiko 24/7 nga libre kung may sunog, krimen, medikal nga emerhensiya, ug ubang kakulian.
“Sa usa lang ka pindot sa telepono, bisa’g kinsa makapanawagan na og pakitabang o’ makataho kung may panghitabo,” mipasabot si Jay Basubas, ang Mandaue city disaster risk reduction and management officer.
Gibutyag niya nga napamatud-an nila ang dakong gamit sa Guardian atol sa mga kasaulogan sa kapistahan sa Balaang Batang Hesus, sama sa Translacion, fluvial parade ug bisan na gani sa Sinulog mardi gras.
ACERT
Kung may alarma sa Mandaue makuha gilayon sa Guardian command center kansang operator maoy manawag sa mi-alerto alang sa dugang nga mga detalye samtang mopadala og moresponde uban sa gikinahanglang kagamitan, matod ni Basubas.
Gawas sa Mandaue ACERT (Accident Control and Emergency Response Team) ug ubang ahensiya sa kagamhanan, ma-alerto sab sa Guardian ang mga pribadong miboluntaryong mo-abag, sama sa mga doktor, nars ug peacekeeper, siya midugang.
Miingon si Basubas nga maka-access ang mga adunay Guardian pinaagi sa Wi-Fi o’ gamit ang mobile data, bisan kung hapit na mahurot ang load o’ hinay ang signal sa mga telco.
Kung dili man, mahimong makigdugtong sa kaugalingong intranet sa Mandaue o’ sa Pipol Konek nga gipakatap na karon sa Department of Information and Communication Technology (DICT) ilabi na dapit sa mga plaza o’ tulunghaan.
Kung may dakong linog o’ bagyo nga makapukan sa kuryente ug komunikasyon, mamahimong ma-deploy sa SugboTek ang kaugalingong mga kagamitan niini harun madawat ug matubag ang mga panawagan sa pakitabang, mibutyag si Dedicatoria.
Nabansay sa SugboTek sa pagdumala sa Guardian sa unang grupo sa Bantay Mandaue sila si Judelyn Estrera, Samuel Montayre ug Raul Patatag.
Milangkob sa ikaduhang grupo sila si Garry Ambe, Joseph Balwado, Lady’s Sparrow Belarmino ug Jeanneth Cuyos. (PR)