Publiko gipahimangnoan sa kapulisan sa dakbayan sa Sugbo nga magmatngon sa laing modus sa pangilad sa mga scammer.
Ning mao nga modus, adunay magpatuo nga kawani sa Philippine Postal Office nga mopahibawo nga adunay package nga gisudlan og mga ilegal nga dokumento ug nakapangalan ngadto sa ilang biktimahon.
Si Police Colonel Ireneo Dalogdog, hepe sa Cebu City Police Office, nibutyag nga adunay huwes nga nagbase sa lalawigan sa Tarlac ang midangop kaniya sa dihang diriyot siya nadala sa caller nga nagpatuo nga taga postal office.
Matod pa ni Dalogdog nga gipahibawo ang huwes sa caller nga adunay package nga nakapangalan niya nga gikatakdang ipadala sa Thailand.
Ang maong package gisudlan sa daghang pasaporte ug ATM cards nga gihulagway nga ilegal.
Dayon gihulga nga mamahimong dakpon gawas kon makapadala sa kantidad nga gidemanda sa mangingilad.
“Moingon dayon nga naa na diri ang pulis, Maam. Nya ang pulis moingon pud nga nakoan ra ba namo, Maam, kay imong pangalan na involve sa ingun ani nga crime. Basin involve sad ka sa money laundering?
“Pwede magpadala ka og P5,000 kay padala aning GCash number for purposes of verification sa imong account kon tinuod gyud na imohang pangalan money laundering,” saysay ni Dalogdog.
Human makapadala sa kwarta, manawag na usab ang mangingilad nga magpahibawo nga dunay pending warrant of arrest ang biktima.
Mopasalig kini nga aron dili mahasol ang biktima, sila na ang moproseso sa piyansa nga mobalor og P10,000. Daghan na matod pa ang nabiktima niini dili lang sa Sugbo lakip na sa ubang dapit sa nasud.