Nag-anam og kakusog ang bagyong Jenny sa Lunes sa hapon, Oktubre 2, 2023, samtang nagkaduol kini sa amihanan nga mga dapit sa nasod.
Matod sa bulletin sa Philippine Atmospheric Geophysical Astronomical Services Administrastion (Pagasa) sa alas 3 sa hapon sa Lunes, ang mata sa bagyong Jenny nahimutang sa mga 540 kilometro silangan sa Calayan, Cagayan o mga 595 sa silangan sa Basco, Batanes.
Dala niini ang hangin nga dunay gikusgon nga 155 kilometro matag oras ug unos nga 190 kilometro matag oras.
Nag-irog kini sa amihanan kasadpan sa 15 kilometro matag oras.
Matod sa Pagasa nga ang Visayas dunay katag nga pag-ulan tungod sa trough sa bagyong Jenny ug localized thunderstorms.
Pipipila ka mga dapit sa Northern Luzon gipaubos sa storm signal no. 1 nga gilangkuban sa Batanes, Cagayan, lakip na ang Babuyan Islands, northern ug eastern portion sa Isabela (Maconacon, Divilacan, Palanan, Santa Maria, San Pablo, Tumauini, Cabagan, Ilagan City, San Mariano, Santo Tomas), Apayao ug northern portion sa Ilocos Norte (Carasi, Vintar, Burgos, Dumalneg, Bangui, Pagudpud, Adams).
Ang Bagyong Jenny gipaabot nga mogawas sa Philippine area of responsibility (PAR) sa Huwebes sa gabii o sa Biyernes sa buntag.