Hapit usa ka semana sa dili pa magsugod ang klase karong Agusto 29, ang mga namaligya og school supplies sa dakbayan sa Mandaue nipausbaw na sa presyo nga labing menos P5 ngadto sa P10 tungod sa kanihit ug pagsaka sa presyo sa ilang pag-angkat.
Niadtong Agusto 23, nisaka na ang presyo sa batakang school supplies sa pipila ka tindahan sa Mandaue, gikan sa mga notebook nga tag P18 ngadto sa P23; lapis gikan sa P8 ngadto sa P11; papel gikan sa P25 ngadto sa P30; ug mga crayon set gikan sa P25 ngadto sa P30.
Ang uniporme sa tunghaan gibaligya na sa P160 ngadto sa P250 (upper blouses) depende sa kalidad sa tela; palda sa babaye (checkered) sa P280 gikan sa P250; (plain) sa P250 gikan sa P240; slacks sa lalaki sa P280 gikan sa P250; shorts sa P100 gikan sa P90.
Itom nga sapatos (panit) gikan sa P290 ngadto sa P640 o P300 ngadto sa P650; ug rubber gikan sa P170 ngadto sa P340, o gikan sa P180 ngadto sa P350 (mahimong motaas ang presyo depende sa gidak-on).
Si Faisah Ali, kinsa namaligya og ready-made nga uniporme sa elementarya ug high school ug mga sapatos sa eskwelahan, niingon nga napugos sila sa pagpausbaw sa ilang mga presyo tungod kay ang ilang suppliers nipausbaw usab sa ilang mga presyo.
Matod pa, kini tungod sa pagsulbong sa presyo sa mga hilaw nga materyales nga gigamit sa pagpanahi sa mga uniporme sa merkado ingon man usab alang sa paghimo sa mga parisan sa sapatos.
Si Jazel Pelayo, tag-iya sa tindahan sa school supplies, niingon nga nipausbaw sila sa ilang presyo sa dihang nipaus-os sa gidaghanon ang ilang supplier nga naghatod kanila og mga butang gikan sa 30 ka kahon ngadto sa 10 sukad niadtong Hulyo ning tuiga.
Hinuon, ang duha ka vendors niingon nga mohatag gihapon sila og mga diskwento sa case-to-case basis, ilabi na sa ilang suki nga nakasabot sa sitwasyon sa mga ginikanan kay ginikanan usab sila sa mga bata sa eskwelahan.
BUDGET
Tungod sa pag-usbaw, pipila ka mga konsumidor ang nagplano kon unsaon nila nga epektibo nga makadula sa ilang badyet nga dili makompromiso ang mga panginahanglanon sa eskuylahan sa ilang mga anak.
Si Mica Ricta, 28, taga Barangay Guizo, dunay duha ka mga tinun-an sa elementarya, niseguro nga ma-canvass ang labing ubos nga presyo sa school supplies sa dili pa mopalit aron makadaginot.
Si Estrellita Encontro, usa ka breadwinner gikan sa Barangay Opao, kinsa namalit og school supplies alang sa iyang mga pag-umangkon, nipili sa pagpalit og mga gamit sa staggered basis ug unahon ang mga gikinahanglan kaayo sa mga bata sa eskwelahan.
Samtang, si Maria Reyes, 35, usa ka housewife nga taga Barangay Pagsabungan, nipili sa pagpalit og ready-made school uniforms alang sa grade one ug two sa iyang mga anak aron makadaginot sa gasto sa pagbayad sa usa ka dressmaker ug pagpalit og panapton ug uban pang mga gamit sa pagpanahi.
Niadtong Hulyo, ang Department of Trade and Industry (DTI) niluwat og price guide aron matabangan ang mga konsumidor sa ilang pagpalit og mga gamit sa eskwelahan nga gitawag og “Gabay sa Pamimili ng School Supplies” human nila namatikdan ang pagsaka sa presyo sa school supplies.
Gipasalig ni DTI Consumer Policy and Advocacy Bureau director Marcus Valdez nga hugot nga nakig-alayon ang departamento sa school supplies manufacturers aron maseguro nga makatarunganon ang presyo ug igo ang suplay sa merkado. (HIC)