GIHANGOP sa kagamhanan sa dakbayan sa Lapu-Lapu ang pagtak-op na sa kapulisan sa imbestigasyon sa kasong pagpatay ni Christine Lee Silawan.
Kini aron usab maka-focus na pagbalik ang kapulisan sa uban nilang gimbuhaton sa paghatag ug seguridad sa dakbayan ilabi na nga daghan ang nagsingabot nga mga kalihukan sa dakbayan karong semanaha.
Gawas niini mobalik na usab ang subsub nga kampanya sa kapulisan sa ubang matang sa kriminalidad sama sa illegal nga drugas ug sugal nga mi us-os sa milabayng mga buwan dihang nakatutok ang atensyon sa kapulisan sa kaso ni Christine Lee.
Matod ni Lapu-Lapu City Mayor Paz Radaza nga base sa iyang nahibaw-an ubay-ubay gayud nga mga pulis ang gipang pull-out sa ilang naandang mga unit ug gimbuhaton aron motabang sa imbestigasyon sa naasoyng kaso hinungdan nga nabalda gayud gamay ang operasyon sa kapulisan.
Sa laing bahin, karong semanaha ubay-ubay ang kalihukan ipahigayon sa dakbayan nunot sa ipahigayong National Youth Day ug ang nagsinagbot nga Kadaugan sa Mactan karong adlawng Sabado Abril 27.
Gibutyag sa mayor nga moabot sa 6 ka mga parokya sa dakbayan ang gamiton sa mga delegado sa NYD karong semanahona.
Gawas niini adunay mga kalihukan nga adto ipahigayon sa Hoops Dome hinungdan nga importante gayud ang seguridad nga ipatuman sa kapulisan.
“With this nga na-file na nila ang case yes still duna pa na silay gimbuhaton but I think ang ubang kapulisan mapunta na sa uban nilang gitrabaho so hopefully naa pa man gihapon ang Silawan case pero at least maluag-luagan sila dyutay” matod ni Radaza. (GCM)