Bana nga nipauli sa ilang balay atol sa Valentine’s Day nabalhug sa bilanggoan human gipadakop sa iyang asawa alas 10:00 sa buntag sa Martes, Pebrero 14, 2023, sa dalan Gonzales, Barangay Ermita, dakbayan sa Sugbo.
Si Daniel (dili tinuod nga ngan), 34, negusyante, gipadakop tungod sa kasong violence against women and children nga gipasaka sa iyang asawa nga si Marie (dili tinuod nga ngan), 29.
Ang tinuod nga mga ngan sa magtiayon gipugngan sa Superbalita Cebu aron sa pagpanalipod sa dungog sa duha ka mga menor de edad nga anak ug sa ginang.
Si Police Major Kenneth Albotra, hepe sa Carbon Police Station, nagkanayon nga napasaka na sa Women and Children Protection Desk sa Miyerkules, Pebrero 15, 2023, ang kaso batok sa bana.
Sumala ni Albotra, wala pasayloa sa asawa ang iyang bana kay giingong siya kulatado ug nakadawat og hulga nga patyon uban sa ilang mga anak.
Si Police Corporal Sandra Villabas sa WCPD sa Carbon Police Station nga nahinabi sa dySS Super Radyo Cebu nagkanayon nga kanunay manghulga si Daniel kon makasuyop sa gidiling drugas ug manghasi kon hubog.
Niadtong Lunes, Pebrero 13, 2023, giingong nanghulga kini sa asawa ug pamilya nga “tagodtaguron” daw niya, uban sa mga bata, mao nga pwerting hadluka nila, matud ni Villabas, ug dayong lakaw.
Dason ni Villabas, wala na makaaguwanta ug nahadlok ang asawa sa iyang bana hinungdan nga gipadakop dihang nipauli.
Asoy sa asawa ngadto sa kapulisan, dihang iyang nakita ang iyang bana nga nipauli, si Marie ug ang mga bata nanago. Nanawag ang asawa sa WCPD sa Carbon Police Station.
Dihang napusasan ang bana, nagluhodluhod kini sa pagpangayo og pasaylo sa iyang asawa.
Wala na panumbalinga sa asawa ug gipasaka ang kasong kalapasan sa Republic Act 9262 kun Violence Against Women and Children (VAWC). (GPL)