Team leader sa usa ka call center company sa dakbayan sa Sugbo nasakpan sa iyang asawa nga kuyog sa iyang kaubang babaye sa team, sulod sa usa ka motel sa Gorordo Ave., Brgy. Kamputhaw, Cebu City sa Martes alas 9 sa buntag, Agusto 29, 2023.
Sa wa pa ang insidente, ang bana giingong nag-status sa iyang social media og termino nga “team building.”
Ang lalaki nga gitago sa ngalang Cardo, 27, minyo, taga-dakbayan sa Lapu-Lapu.
Napusasan uban kaniya ang giingong iyang kabit nga kauban ra sab sa trabaho nga gitago sa ngalang Mara, 20, dalaga, taga Brgy. Luz, dakbayan sa Sugbo.
Ang duha nasakpan sa akto sa asawa nga si Ellen (dili tinuod nga ngalan), 27, negusyante, uban sa kapulisan sa dakbayan sa Sugbo sulod sa usa sa mga lawak sa motel.
Si Ellen nagpakuyog sa iyang higala nga si Sandra (di tinuod nga ngalan) sa pagpangayo og panabang sa Investigation and Detective Management Branch (IDMB) sa Cebu City Police Office (CCPO) human iyang nasubay ang iyang bana nga anaa sa sulod sa motel.
Tungod niini, daling niabag ang mga sakop sa IDMB ug ilang girumbo ang lawak diin ni-check in ang duha nianang sayo sa buntag.
TRACKING DEVICE
“Ako man gibutangan sa tracking device, GPS ang ilawom sa motor. Napalit to nako, Sir, sa online,” matod pa ni Ellen sa dihang nahinabi sa Superbalita Cebu.
Nasayran sa asawa base sa social media post ni Cardo nga aduna silay team building sa trabaho.
Wa na mohatag og dugang detalye ang asawa, kinsa gisakitan sa gihimo sa iyang bana sulod sa ilang kaminyuon.
Samtang ang iyang higalang si Sandra niasoy nga sa dihang nahibaw-an sa iyang amiga ang bisyo sa bana, gisakitan sila kay kaila ra nila si Mara.
Gumikan niini, gisugdan na og monitor ni Ellen si Cardo hangtod ilang naaktuhan.
Ang mga suspek gisuwayan og kuha og habig sa Superbalita Cebu apan nagdumili sa pagtubag.
Nasayran nga nagsugod ang pagduda sa asawa, base sa gibutyag sa kasaligang tinubdan, nga ang magtiayon adunay joint account sa Facebook, apan dili na maabli ni Ellen ang account.
Nagduda siya nga adunay “milagro” nga gihimo ang iyang bana ilabi na nga kanunay nga ma-late sa iyang pagpauli sa balay.
Gani adunay higayon nga bisan og way duty, maugmaan sa pagpauli.
Hangtod nga naabot sa punto nga kanunay ang ilang panaglalis ug away.
Sa nanglabay nga mga buwan, giingong nisuway og kutlo sa iyang kinabuhi si Ellen pinaagi sa paglaslas sa pulso tungod sa iyang grabeng kahiubos ug di niya maagwanta ang kasakit nga iyang gibati sa dihang iyang nakonpirmar nga adunay laing gikalingawang babaye ang iyang mister.
Si Police Staff Sgt. Richell Bibas, chief sa Women and Children Protection Desk (WCPD) sa Abellana Police Station, nagkanayon nga kasong concubinage ang ilang giandam batok sa duha. (GPL)