Gikan sa mabugnaw nga inn, paingon sa alimuot nga selda sa Carcar City Police Station ang natugpahan sa hamtong nga lalaking minyo ug biyuda human sila naabtan sa asawa ug kapulisan niadtong Sabado sa ala 1 sa hapon, Hulyo 1, 2023 sa Brgy. Valladolid, dakbayan sa Carcar.
Ang duha mag-kababata naabtan nga giingong pulos nakatapis og tualya sa pagsulod sa reklamanteng asawa ug mga polis sa dakbayan.
Si Police Lieutenant Colonel Mark Gifter Sucalit, hepe sa Carcar City Police Station dihang nahinabi sa Superbalita Cebu, nibutyag nga usa ka 54 anyos nga asawa nidangop sa ilang buhatan niadtong Sabado human nga nasundan niini ang iyang bana nga dunay kuyog nga laing babaye sa pagsulod sa usa ka inn mga ala 1 sa hapon.
Matod ni Sucalit nga ang asawa nagduda na sa iyang bana nga dunay lain mao nga iyang gipanid-an.
Uban sa iyang anak, sila ningsakay og laing motorsiklo, gisundan ang bana.
Nakita sa asawa nga ang duha nga nag-angkasay sa motorsiklo paingon sa inn dayon nanulod.
Nidiretso sa Carcar Police Station ang asawa aron magpakuyog sa kapulisan.
Sa ilang pag-abot sa inn, nidiretso sila sa kwarto diin ilang gituktok ug sa pag-abli, giingong nagtapis lang og tualya ang duha.
Matod ni Sucalit nga ang biyuda kababata sa bana.
Gidakop ang duha ug gibalhog sa prisohan.
Kasong concubinage ipasaka batok sa bana ug sa biyuda.