Usa ka 18 anyos nga notado nga kawatan og motorsiklo nga nabutang sa no. 1 most wanted person sa Highway Patrol Group 7 (HPG) 7 nadakpan sa mga sakop sa Criminal Investigation and Detection Group (CIDG) Mandaue City Field Unit inabagan sa City Mobile Force Company sa Cebu City Police Office ubos sa pagpangulo ni Police Lieutenant Colonel Dexter Calacar human nalutsan og warrant of arrest sa kasong carnapping.
Ang akusado nga nadakpan giila nga si Silas Kyle Kiel Isidro, alyas Christian, taga sitio Mangahan, Barangay Punta Princesa, Dakbayan sa Sugbo.
Ang pagsikop gipasikad sa warrant of arrest nga giluwatan ni Judge Dennis Larrobis sa Regional Trial (RTC) Branch 76 sa dakbayan sa Naga pinitsahan og Enero 19, 2021. Way piyansa nga gitugot ang korte alang sa temporaryong kagawasan ni Isidro.
Matod ni Calacar nga sa nag edad pag 12 si Isidro, kusog na kini nga mangawat og motorsiklo apan naglisud sila sa pagdakop kay menor de edad pa.
Gani makadaghan na siya naalarma sa kapulisan apan dali nga makasibat.
Giingong didto kasagaran mangigo sa siyudad sa Naga ug mga silingang lungsod sa probinsya sa Sugbo ang akusado kauban ang laing lalaki nga motabang kaniya sa pagpangawat.
Niadtong Marso 26, 2020, nadakpan na si Isidro ug kauban niini sa kasong carnapping human niya kawata ang usa ka Honda XRM 125 sa Barangay Colon, siyudad sa Naga, apan nakapiyansa kini.
Gibutyag ni Calacar nga gipaubos nila sa surveillance ang akusado hangtod nga ilang nasigpatan sa balay niini sa Punta Princesa.
Dali nilang gi-serve ang warrant of arrest.
Wa na makaipsot ang akusado sa kalit nga pag-abot sa kapulisan sa ilang balay diin siya gibasahan sa iyang katungod ug gipahibawo sa kasong giatubang niya.
Ning pagkasikop, lahi na ang mahitabo kay di na siya makalingkawas sa bilanggoan samtang magpaabot hangtod maresolbar kini sa korte.
Wa pa masayod ang kapulisan kon duna pa bay laing mopasaka og kaso batok kang Isidro sa iyang mga nabiktima.