PANGIYAWAT sa posibleng kitaon ang nagtukmod sa usa ka motorbanca nga molawig sa kadagatan sa Olango ug Mactan kagahapon sa Miyerkules sa kaadlawon bisan sa kabati sa kahimtang sa dagat.
Mao kini ang paghulagway ni Kapitan Cyrus Eyas sa Brgy San Vicente nga usa sa unang ning-rescue sa 10 ka mga sakay sa M/B Joseph Express nga niunlod sa dagat sa Miyerkules sa kaadlawon, Agusto 7.
Luwas ang kahimtang sa mga pasahero sa nalunod nga bangka nga nailang sila si Predgie Daño, 28, taga Brgy. Tungasan; Adora Daño, 30, taga Brgy. Tungasan; Celda Fernandez, 50, taga Mahayahay, Pasil, Dakbayan sa Sugbo; Vanessa Daño, 29, taga Mahayahay, Pasil; Lolito Abadajos, 32, taga Caubian Island sa Olango; Ma. Theresa Acoril, 54, taga Pasil ug Glaiza Aying, 30, taga Tungasan.
Matod ni Eyas nga nigikan ang bangka sa ilang dapit alas 3:30 sa kadlawon bisan kon way gitugotang makalawig gumikan sa kadagko sa mga bawod.
Sa wa damha, ang motorbanca napagngan sa lawod sa tunga-tungang sa Olango ug Mactan 30 minutos human sila makagikan sa Brgy San Vicente, isla sa Olango.
Gumikan sa kadagko sa bawod, nasudlan ang bangka og dagat hinungdan sa pagkaunlod niini.
Dali usab sila nga mi-rescue sila si Eyas human masayod sa hitabo.
Matod ni Eyas gipakyaw ang bangka og tag P300 matag pasahero gumikan kay kasagaran mga trabahante ang ningsakay nga wa makatrabaho sa syudad sukad niadtong Lunes.
Giklaro hinuon ni Eyas nga wa siya magkuwang sa pagpahimangno sa iyang mga residente nga di molawig gumikan kay gawas nga grabe kadagko ang bawod, posible pa nga makamulta sa Coastguard ang masakpang molawig nga way pagtugot gikan kanila.
“Nangiyawat lage kay wala pay coastguard unya taod-taod nasad wa kabiyahe sukad atong Dominggo unya namugos pud ang mga pasahero,” matod ni Eyas.
Matod sa tigpamaba sa Coast Guard Central Visayas, Lieutenant Junior Grade Michael John Encina, mosusi ang Coast Guard Station Cebu niini ug pahamtangan ang tag-iya sa bangka og Inspection Apprehension Report (IAR).
Bisan kon giisa ang gale warning diin gidili ang pagbiyahe sa mga sakyanang pandagat sa kadagatan tungod kay dagko ang bawod tungod sa kusog nga hapak sa hangin, mi-risgo pagbiyahe kining way ngan nga motorbanca.
Nasayran nga iya ni Randy Barong ang way ngan nga bangka.
Dugang ni Encina nga mag-atubang og multa ang tag-iya sa barko nga nibiyahe bisan og di pwede tungod sa bati nga panahon ug wa’y clearance gikan sa Coast Guard.
Si Lapu-Lapu City Mayor Junard “Ahong” Chan, sa iyang bahin, nihulagway sa hitabo nga magsilbi untang warning sa mga nanang-iya og motorbanca nga di mopugos og lawig aron kalikayan ang disgrasya.
Iyang gisaaran ang mga mangingisda nga wa na kapanagat sukad niadtong Dominggo nga tagaan og bugas ug mga de lata aron ikasapar sa ilang inadlaw-adlawng panginahanglanon.
Ang mga kapitan sa kabarangayan sa isla sa Olango maoy gitahasan ni Chan sa pagtudlo niining maong mga apektado sa kasamtangang bati nga kahimtang sa dagat aron mahatag na niya ang mga grocery items.
Samtang abagahon usab sa kagamhanan sa dakbayan ang pagkaon sa mga pasahero nga na stranded sa mga pantalan sa dakbayan samtang wa pay gitugotang makalawig sa kadagatan.