HINUNDAYAN, Southern Leyte - Padayon ang search and rescue operation sa lima ka tawo nga sakay sa usa ka motorbanca nga nalunod sa boundary sa kadagatan sa Hinundayan, Southern Leyte ug Loreto, Dinagat Island.
Ang report nadawat sa awtoridad alas 10:30 sa buntag, Dominggo, Hunyo 30, 2019.
Ang kapulisan sa Hinundayan pinangulohan ni Patrolman Renato Cascayan ug Kelvin Monton sa Municipal Disaster Risk Reduction Management Office nakig-alayon sa Philippine Coast Guard.
Niresponde ang grupo sa lugar diin giingong nalunod ang maong motorbanca.
Ang lima ka sakay gilangkuban sa duha ka Austrilian nationals nga sila si Grahame David Hastings, 60, ug Donald Cox, kasamtangan nga nagpuyo sa Tahusan, Hinunangan, Southern Leyte.
Samtang ang laing tulo mao sila si Jay-ar Adanza, 40; Serecio Adanza, 40, ug Michael Samatina, 30, pump boat operator.
Base sa inisyal nga pakisusi, gikan sa Hinunangan ang mga pasahero paingon unta sa Barangay Gibusong, Loreto, Dinagat Island.
Nakasinati og mechanical failure ang motorbanca ug aksidente kini nga nalunod.
Sa paghimo ning balita, padayon pa ang search and rescue operation sa hiniusang puwersa sa kapulisan, Municipal Disaster Risk Reduction and Management Office ug Coast Guard. (Superbalita Cebu)