KANANGA, Leyte - Namatay ang usa ka barangay kagawad ning lungsod kahuman gipusil sa wa mailhing mga gunman alas 3:30 sa hapon, Martes, Oktubre 15, 2019 sa Libongao national highway.
Giila sa kapulisan ang biktima nga si Rene Superior, 41, taga Sitio Mahayahay, Barangay Libongao ning lungsod diin siya nagsilbi nga kagawad.
Ang biktima giingong nagmaneho sa usa ka single nga motorsiklo ug pag-abot duol sa ilang balay, girakrakan kini.
Naigo kini sa ulo ug ubang parte sa lawas nga miresulta sa iyang hinanali nga kamatayon.
Base sa inisyal nga imbestigasyon, ang mga gunman sakay sa usa ka puti nga sakyanan nga daling nisibat human sa hitabo.
Dugang nasayran sa kapulisan nga si Superior kanhi sakop sa rebeldeng New Peoples Army (NPA).
Gitino sa kapulisan ang impormasyon nga nahimo siyang sakop sa “Espinosa group” nga posibleng nagpasabot sa grupo ni self-confessed drug lord Kerwin Espinosa.
Si Kerwin nabilanggo human madakpi sa abroad dihang nilayas kini samtang ang iyang amahan nga si anhing Albuera Mayor Rolando Espinosa.
Ang mayor napatay sulod sa prisohan human giingong nisukol sa usa ka team sa Criminal Investigation and Detection Group (CIDG) 8.
Ang grupong Espinosa gitumbok nga maoy labing dakong grupo nga naglihok sa Eastern Visayas.
Base sa mga kabhang sa mga bala nga nakuha sa crime scene, tag-as nga kalibre sa armas ang gigamit sa pagpamusil sa biktima.
Padayun pa ang ang imbestigasyon sa kapulisan sa motibo sa pagpatay kang Superior.
Wa usab nila isalikway ang posibilidad nga may kalabutan kini sa iyang kanhi naapilan nga grupo. (JKDP)