Usa ka 47-anyos nga barbero nasikop human nasakpan nga nangawat sa usa ka shopping mall sa Barangay Tabunok, dakbayan sa Talisay sa Lunes sa hapon, Agusto 8, 2022.
Si P01 Raffy Rempojo, imbestigador sa Talisay City Police Station niila sa suspek nga si Jerome Abanay, kinsa giingong nangawat og upat ka branded nga maong shorts nga nagkantidad og kapin sa P4,000.
Ang mga butang nga gikawat ni Abanay mao ang duha ka piraso sa Oxygen brand shorts nga nagkantidad og P599 matag usa, nga adunay kinatibuk-ang balor nga P1,198 ; duha ka piraso sa Mr. Lee nga brand nga nagkantidad og P1,599, sa kinatibuk-an balor og P3,198.
Si Rempojo nitug-an sa SunStar Cebu, nga si Abanay residente sa Pusok, Lapu Lapu City ug giingong niangkon nga siya kawatan tungod kay aduna siyay mga kaagi sa pagpangawat og mga maong shorts ug polo shirts, diin siya nadakpan duha ka higayon sa Mandaue City ug Lapu-Lapu.
“Og wala siyay customers sa barbershop, mao ni iya sideline. First time no niari siya og Talisay kay nibalhin na pod og lain nga lugar para ipadayon iyang binuhatan.Usahay naa siyay madungan nga mga shoplifter pod, pero mag solo flight ra ni siya,” matud pa ni Rempojo.
Matud ni Rempojo, gisul-ob sa suspek ang upat ka maong shorts sa fitting room dayon nipaingon sa exist area diin siya nabantayan sa mga sensor sa mall.
Si Abanay nidagan samtang nisuway pag-ikyas apan gisundan siya sa mga security guard ug nadakpan dayon.
Matud pa ni Aljon Altoveros, usa sa mga security guard sa mall, nga wala nila nailhi si Abanay dihang nisulod sa maong lugar.
Wala kini mabantayi samtang namalit kay kalmado lang ug inosente kaayo ang hitsura.
“ Na detect ni sa sensor ang suspek. So, pagka alarm, nidiretso na mi og responde. Nidagan siya pagawas dayon amo ni gigukod ug na aresto namo alas 3:40 sa hapon,”matud ni Altoveros.
Ang suspek gi-turnover mga alas 6:50 sa gabii sa Agusto 8 ug anaa na sa kustodiya sa kapulisan ug mag-atubang og kasong pagpangawat.