Ipaimbestigar ni Carcar City Mayor Patrick Barcenas ang giingong reklamo sa mga mamalitay og lechon baboy sa merkado sa siyudad nga gi-post sa social media.
Apan matod ni Barcenas sa interview sa Superbalita Cebu nga wala siyay nadawat nga reklamo.
Sa miaging semana, nisuroy pa ang mayor sa mga namaligya og delicacy sa dakbayan, apil na sa mga naninda og lechon.
Dugang sa mayor nga kon dunay mga reklamo iya kining susihon kon unsa ka tinuod.
Mamahimo usab nga makabisita sa iyang opisina ang kadtong ni-post aron mapangutana niya kon unsay nahitabo.
Sa post sa usa ka netizen, iyang gibutyag nga mogara ang mamaligyaay ilabi na kon langyaw ang kustomer.
“Kamo mga tindera og inasal ayaw ninyo tapok-i, ayaw sab ninyo kabyuni. Imbis mopalit mi usa ka tibuok nga inasal usa na lang ka kilo kay gisamokan mi,” matod sa post sa netizen.
Laing netizen usab ang nipadayag sa susama nga kasinatian.
Dunay samang mga reklamo kaniadto kalabot sa mga namaligya og lechon apan nakorihian ang mao nga isyu pinaagi sa local government unit (LGU). (BBT)