ANG Cebu City Council niaprobar aron tugotan si Mayor Michael Rama sa pagpirma sa Joint Venture Agreement (JVA) tali sa New Sky Energy (Philippines) Inc. (NSEPI) alang sa katukoran sa waste-to -energy (WTE) facility sa dakbayan sa Sugbo atol sa ilang regular session niadtong Marso 9, 2022.
Ang facility moproseso og 800 tons nga basura matag adlaw ug gibana-bana nga mo-produce kini og 18 megawatts nga kuryente.
Si Konsehal Raymond Alvin Garcia, kinsa maoy niduso sa resolution, nilampos human siya nakakuha og 9-5 nga boto pabor sa paghatag og authority ni Rama samtang duha ang ning-abstain.
Ang mga ningpabor mao silang City Councilor Phillip Zafra, Joel Garganera, Renato Osmeña Jr., Garcia, Dave Tumulak, Eduardo Rama, Jerry Guardo, Niña Mabatid ug James Cuenco samtang ang ningsupak silang Alvin Dizon, Franklyn Ong, Lea Japson, Eugenio Gabuya Jr., ug Nestor Archival Sr. samtang ni-abstain si Joy Pesquera ug Jessica Resch.
Si Garganera, chairman sa committee on energy sa Konseho, nagkanayon nga pinaagi sa WTE, mahawan na ang basura sa dakbayan ug aduna pay bahin ang City Government sa kita sa pasilidad.
Kini nga proposal aprobado na sa Asian Development Bank (ADB), matod ni Garganera
Base sa inisyal nga kasayuran nga ilawom sa JVA, adunay P1,000 nga tipping fee sa unang tulo ka tuig ug mosaka ngadto sa P1,150 sa ikaupat hangtod sa ikaunom nga tuig. Ang City Hall adunay 3% share sa gross net income sa New Sky , 5% nga share sa laing mga local government unit nga molabay og basura sa WTE ug laing 3% sa kita sa 18 megawatts nga kuryente.
Si Garganera nagkanayon nga human sa approval sa JVA ug kon mapirmahan na ni Rama, ang NSEPI gihatagan og 365 ka mga adlaw sa pagkumpleto sa tanang mga rekisito sama sa permit gikan sa barangay, City Hall, environment compliance certificate (ECC) gikan sa Department of Environment and Natural Resources (DENR) ug ubang mga buhatan.
Ang chairman sa committee on energy nagkanayon nga kini maoy hustong lakang alang sa Siyudad sanglit niadtong 2016, gipasirad-an sa korte ang kanhi Inayawan Landfill ug gimanduan ang Dakbayan paghimo og lakang aron maprotektahan ang kalikupan apan wa kini mahimo.
Ang opposition nga gipangulohan ni minority leader Konsehal Nestor Archival niingon nga importante ang pasilidad sanglit masolusyonan ang problema sa basura, apan iyang gipadayag nga walay basehanan ang paghimo sa maong joint venture.
Matod ni Archival nga ilawom sa JV Ordinance, kinahanglan naay equity ang duha ka mga habig sama sa yuta, ekipo ug uban pa apan sa maong JVA, walay tampo ang City Government.
Gipadayag niya nga walay feasibility study ug financial study nga gihatag ang proponent sa WTE, apan gitubag ni Garcia nga ang pagpresentar sa maong mga dokumento naa sa level sa Joint Venture Selection Committee ug ang papel sa Konseho mao ang pag-approve o disapprove.
Dugang ni Archival nga wala nisunod sa iyang gipasar nga resolution ang majority nga magkuha sila og bag-ong legal opinion sanglit ilang gihimong rason sa mayoriya nga aduna nay legal opinion alang sa JVA atol sa pagdumala ni City Attorney Rey Gealon. Wala pa mahibaw-i asa tukoron ang pasilidad.
Si Mayor Michael Rama, sa iyang bahin, nagkanayon nga wala pa siya nakadawat sa kopya sa JVA apan iya kining susihon.
Matod niya, dugay na kining giplano sa Siyudad apan wala pa nahitabo kaniadto.
“I will check on it. That was being a part of long time ago pa, mga solid waste management approaches mao nang I am not closing (the possibility). All of these will be presented. Atong i-evaluate in order to solve our garbage problem,” matod ni Rama.
Ang maong pasilidad gikatakdang buboan og P4.8 bilyones nga puhonan sa NSEPI ug walay bisan piso nga gasto ang Dakbayan sa Sugbo. /