Nalumos ang usa ka 4 anyos nga batang lalaki mga alas 12:30 sa udto sa Sabado, Mayo 6, 2023 samtang naligo sa dagat uban sa iyang mga kabanay ug higala sa Sitio Bantigue, Barangay Luyang, lungsod sa Carmen, amihanang sa Sugbo.
Ang biktima giila nga si Francis Stephen Sagario, nagpuyo sa dapit.
Wala siya mabantayi nga na missing na sa iyang mga kauban nga nangaligo.
Paglabay sa pipila ka minutos, nakit-an siya sa caretaker sa balay sa mayor sa lungsod nga naglutawlutaw mga 500 metros gikan sa ilang gikaligoan.
Matod sa caretaker nga nagpahingan lang og Dennis nga nakit-an niya ang bata nga nag-ubo nga naglutaw sa dagat.
"Nakit-an nako nga murag bata man ni. Ako dayon gidagan ug akong gigunitan ang duha ka tiil ug akong gihuhu aron moagas ang dagat nga iyang nainom. Mao to ni dagan ko kay ako gipangita ang ginikanan ani," matod ni Dennis sa interbyu sa sibyaanang dyHP.
Si Soledad Sagario, inahan sa bata, nibutyag nga wala siya makamatikod nga nalumos na ang iyang anak kay kompyansa siya tungod kay kauban niini ang dagko nga mga bata.
"Naa man ni siyay mga kauban nga dagko. Nganong nalumos man ni?," pangutana ni Soledad nga naghilak samtang nahinabi sa Superbalita Cebu.
Usa sa iyang mga kauban nga nahinabi sa dyHP RMN Cebu nitug-an nga ilang gipangita ang bata apan dunay niingon nga mipauli kini.
Ang maguwang sa biktima nga 12 anyos nibutyag nga nag-ilis na ang iyang manghod aron mopauli, apan nagduwa-duwa kini kauban sa iyang barkada.
Nagtuo sila nga naugbok ang ulo niini samtang nag ambak-ambak ug walay nakabantay.
"Nag ilis na man na siya kay mouli pero nag ambak-ambak na sila diha sa dagat ay. Kabalo man na siya molangoy," matod sa maguwang sa biktima.
Gidala ang biktima sa tambalanan sa lungsod sa Carmen apan gideklarar nga patay nang niabot.
