BAYOT nga kawani sa kagamhanan sa Siyudad sa Sugbo ang nalutsan og warrant of arrest sa kasong cyber libel ang nadakpan sa mga sakop sa City Mobile Force Company sa Cebu City Police Office (CCPO).
Ang dinakpan giila nga si Emar Cueco alyas Jenky Cueco nga taga-dalan Alviola, Sityo ICM, Barangay Tejero, Siyudad sa Sugbo.
Matod ni Police Lieutenant Colonel Wilbert Parilla, deputy city director for operation sa CCPO nga si Cueco gikiha sa usa ka personalidad human niya tamaya sa iyang Facebook page.
Ang maong post maoy gihimong ebidensya ug dayong reklamo ngadto sa Regional Anti-Cyber Crime Unit 7 nga gipasaka usab dayon ngadto sa korte. Dugang ni Parilla nga ang nahitabo kang Cueco magsilbing leksyon sa netizens nga dili magpataka og pamasangil nga way basehanan. (AYB)