Beep Cebu di mobiyahe
Temporaryong mopahunong una sa operasyon ang mga modern bus-jeep ubos sa Beep Cebu sulod sa unom ka mga buwan sugod sa Oktubre 1, 2023.
Kini maoy gipahibalo sa management subay sa giluwatang memorandum niini sa Septiyembre 22, 2023.
Lakip sa bug-at nga rason sa transport group mao ang kakuwang sa spare parts sa ilang units tungod sa nagpadayong gubat sa Russia ug Ukraine.
Sagad sa mga modern jeep niini ginama sa Russia ug ang uban usab ginama sa China.
Gawas niana, giingong dako usab ang ilang alkanse sa giluwatang special permits sa ubang mga competitor sa public utility vehicles nga may rota sa Cebu City Hall paingon sa IT Park ingon man ang Banawa paingon sa Panagdait, Brgy. Kasambagan.
Ingon man ang kalangay sa gi-request niining route o extension modifications ug padayong BRT construction nga nakaapektar sa rota niini sa Guadalupe paingon sa Carbon.
Apan si Eduardo Montealto Jr., regional director sa Land Transportation Franchising and Regulatory Board (LTFRB 7), nagkanayon nga wala pa sila nakadawat sa plano ug desisyon sa Beep Cebu hinungdan nga gikatakda kining mopadala og show cause order aron mahatagan og katin-awan ang mga yangungo niini.
Hinuon, mipasalig si Montealto nga dili angay nga mabalaka ang publiko sa desisyon sa grupo sanglit duna pa’y daghang transport cooperatives nga makahulip.
“Dili ra, atong pulihan. Ato ipa-show cause order kay so far wala man ko’y nadawat nga communication. Dili man pod na pwede nga diha diha dayon. Pero daghan kaayo mag-ilog ana,” matod ni Montealto sa Septiyembre 25, 2023.
“Daghan man kaayo ta og cooperatives. Ang atong federation sa cooperatives naay eight cooperatives naa na sila’y 20 percent sa ilang fleet. Example naa silay 100 ka units, ang 20 ana standby na, wala nagdagan sa modern maong daghan ta og ikapuli..Ang competition ana man gud ana is sa traditional, wala pa gipabalik ang traditional okay kaayo unta ilang income, dili pod ta magkulang pero diha sila mag compete,” dugang ni Montealto.
Iya usab gipahinumdoman ang mga traditional jeepney drivers ug operators sa pag consolidate o pagpaubos sa mga kooperatiba sa dili pa ang deadline niini sa Disyembre 31, 2023. (ANV)