Usa ka modern jeep nga gipanag-iya sa Persano Corp., nagbiyahian sa dakbayan sa Sugbo, kalit nga nisilaub sa alas 8:30 sa gabii sa Martes, Nobiyembre 29, 2022, taliwa sa pagbunok sa uwan.
Si FO3 Emerson Arceo sa Cebu City Fire Office (CCFO) nagkanayon nga kini nahitabo sa Osmeña Boulevard duol sa Fuente Osmeña sa Barangay Santa Cruz, siyudad sa Sugbo.
Pag-abot sa mga bombero, matud ni Arceo, napalong na usab dayon ang kayo, apan gipaneguro nila nga dili na masubli pa.
Dugang ni Arceo nga ang maong sakyanan gimaneho sa usa ka John Razel Gabines, kinsa sa ilang pag imbestigar nisulti nga nagsugod ang pag-silaub sa kayo sa suga sa atubangan sa Beep nga posibleng dunay napaksit nga wire nga maoy gigikanan sa kayo.
Gibanabana usab nga moabot lang sa P5,000 ang danyos sa nasunog nga parte sa sakyanan.