Bgry. Konsehal sa Olango gipusil patay; Chan, Radaza mitanyag og ganti sa makaila sa mamumuno

Tampo ni Teteth Mata
Tampo ni Teteth Mata

KONSEHAL sa Barangay Tungasan, Isla sa Olango, Dakbayan sa Lapu-Lapu namatay sa pagpamusil niadtong Dominggo sa gabii, Mayo 8, 2022.

Giila ang biktima nga si Jose "Sadam" Quiros, kinsa gipusil-patay sa wa pa mailhing mamumuno pasado alas 11 sa gabii.

Ang gunman dunay duha ka laing kuyog nga nagsilbeng lookout.

Gikondena ni Lapu-Lapu City Mayor Junard “Ahong” Chan ang pagpatay ug nanawagan sa Philippine National Police (PNP) nga sulbaron dayon kini.

"As the city mayor, I cannot let this incident pass without taking action for the swift resolution of this case. I call on our Philippine National Police to quickly solve this matter. If it warrants, I call for the creation of a special task force for the PNP to solve this wanton disregard of life," matod niya.

“Isip amahan sa dakbayan, manawagan ko sa mga supporters sa nagkalainlaing pulitikanhong pundok nga magpabiling kalmado ug atong e-exercise ang atong katungod sa pag pili sa atong lider sa pamaagi nga hapsay ug limpyo,” dugang pa niya.

Nipahibawo usab siya nga mohatag og reward niadtong makahatag og impormasyon nga makatabang sa pagsulbad sa kaso.

“Mohatag sad ko og ganti sa kon kinsa man ang makahatag og tukma nga impormasyon nga makatabang sa pag sulbad sa kaso... Sa pamilya ni Kons. Sadam Quiros, dawata ang akong pahasubo ug ang saad nga kutob sa akong mahimo tabangan tamo nga ma kab-ot ang hustisya,” matod ni Chan.

Si Lapu-Lapu City lone congressional district Representative ug kanhi Lapu-Lapu City mayor Paz Radaza, kinsa modagan batok kang Chan karong piniliay, nitanyag og P300,000 isip reward money niadtong makatabang sa pag-ila sa gunman.

"Sadam, ayaw pagkatulga, ayaw pakan-a, ayaw tuguti nga maka-ikyas ang nagbuhat nimo ani. Hasula og maayo ang ilang kinabuhi hangtod sila mo surrender," nagkanayon si Radaza sa usa ka pamahayag.

Gihangyo usab niya ang PNP nga imbestigahon ang insidente.

"Nagbangutan ko uban sa akong pamilya sa kamatayon ni Konsehal Sadam ug ako maningkamot nga makab-ot ang hustisya para kang Kons. Sadam sa pinakadaling panahon," dugang ni Radaza.

Si Quiros aktibong tigpaluyo ni Radaza.

Ang kapulisan sa Olango, sa pakighinabi, nitug-an sa SunStar nga nangita sila og closed circuit television (CCTV) camera footage duol sa dapit diin si Quiros gipusil.

Si Quiros nakig-estorya sa laing tawo atubangan sa Triponia's Food Park nga iya ni Barangay Captain Triponia Abaya sa Tungasan.

Matod ni Senior Master Sergeant Madelon Mangarin sa Olango Police Station nga ang gunman nagsul-ob og yellow nga senina ug yellow nga kawo.

Si Quiros nakaangkon og upat ka samad pinusilan, matod sa kapulisan, ug midugang nga dali siyang gidala sa Sta. Rosa Hospital human sa pagpamusil, apan patay nang niabot. (EHP/LMY/REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph