Tungod sa nagkalainlaing hinungdan, 10 porsiyento pa lang ang natapos sa Phase 1 sa modernisasyon sa Carbon Public Market nga opisyal nga gilusad niadtong Abril 2022.
Ang Phase 1 gikatakdang makompleto sa 2028, nga naglakip sa main public market building ug ang commercial component, parking spaces ug sewer facilities.
Sa pagkakaron, unang natukod ang interim market, pagbalik sa Freedom Park, Sto. Niño park and chapel, ug paglusad sa Carbon Night Market.
Si Lydwena Eco, Cebu2World Development Inc. (C2W) deputy general manager, una nang gikutlo sa mga taho nga namahayag nga nakaapekto sa dagan sa trabaho mao ang pandemiya sa Covid-19, bagyong Odette ug ning ulahi mao ang isyu sa Compania Maritima.
Hinuon, nag-ung-ong na ning tuiga ang pagtrabaho sa bag-ong main market building.
Matod ni Eco, gipaabot nga makamugna kini og mokabat sa 500 ka mga trabaho sa pagtukod niini.
Ang mga plano sa engineering alang sa nag-unang merkado publiko anaa na sa iyang katapusang mga hugna ug ang gikinahanglan nga mga permiso gisiguro na aron masugdan ang pagtukod sa modernized nga merkado, matod ni Eco.
Apan, nabalaka gihapon ang pipila ka mga ambulant vendor kon makaseguro ba sila og vending area sa higayon nga mahuman na ang redeveloped Carbon market, dugang sa pipila kanila, kinsa nipili sa paghunong sa pagpamaligya tungod kay wala silay dako nga kita sa lugar diin sila gibalhin.
Si Eco, sa pakighinabi sa Huwebes, Abril 20, 2023, niingon nga sukad sa pagsugod sa konstruksyon sa redevelopment project, ang C2W nag-hire na og lokal nga mga trabahante, kasagaran gikan sa mga host community sama sa Barangay Ermita, Santo Niño, ug San Roque.
Hangtod sa Abril 20, ang Carbon redevelopment project anaa pa sa 10 porsiyento nga completion rate, lakip na ang interim developments.
Base sa datos sa Market Operations Division (MOD), adunay kapin sa 3,000 ka ambulant vendors sa Carbon Public Market.