Ang duha ka mga shipping operator mosugod og pagpabiyahe sa ilang mga barko gikan sa pribadong pier sa Liloan, Cebu, paingon sa Poro, sa Camotes islands karong Mayo 26, 2023.
Kini ang gipasalig sa Ocean Jet ug Super Shuttle Ferry managements ngadto kang Gobernador Gwendolyn Garcia nga ilang gipakigtagboan sa buhatan niini sa Huwebes, Mayo 18, 2023 uban sa Pier 88, Maritime Industry Authority (Marina), ug Vallacar Transit, tag-iya sa Ceres bus.
Si Garcia, niadtong Abril, gusto kaayo nga masugdan sa labing dali ang mga biyahe sa isla kay sa Mayo daghan ang mamakasyon.
Gihimo kini ni Garcia aron mahatagan na ang mga Sugbuanon og alternatibo nga mga barko nga makaabot sa Camotes nga di lang magsalig sa Jomalia Shipping nga manukad sa Danao city.
Ang duha ka mga shipping company mobiyahe sa rota nga Liloan-Camotes-Liloan ka usa matag adlaw.
Ang Oceanjet mobiyahe gikan sa Liloan paingon sa Poro nga rota sa alas 8:30 sa buntag.
Ang Marina nipasalig sa pag-isyu sa gikinahanglan nga mga permiso alang niini nga mga rota.
Ang LTFRB, sa ilang bahin, niisyu na og prangkisa sa mga Ceres bus nga isakay usab sa roro vessel nga iya sa Super Shuttle nga mobiyahe Cebu City-Liloan-Camotes route.
Wa dayon makasugod sa biyahe ang roro niadtong Abril kay gikinahanglan pa diay nga paladman ang pribadong pantalan.
Gawas sa Liloan-Camotes, ang mga fastcraft nga manukad sa Liloan moserbisyo usab sa rota padulong sa dakbayan sa Lapu-Lapu ug ubang mga dapit sa Metro Cebu.