USA ka biyuda talandugon ang kahimtang human gidunggab sa iyang silingan sa Sitio Cantecson, Barangay Gairan, dakbayan sa Bogo, alas 10:50 sa gabii sa Sabado, Pebrero 26.
Ang biktima mao si Elvira Vargas Ynoc, 54, nagpuyo sa naasoyng lugar, nakaangkog samad dinunggaban sa tiyan.
Si Chanti Catagbo, 35, ulitawo nagpuyo sa nahisgutang lugar nasikop sa kapulisan.
Sa imbestigasyon ni Police Staff Sgt. Leliano Pepito, imbestigador sa Bogo Police Station, nagkanayon nga nagkalalis ang biktima ug ang suspek human gikaaway sa suspek ang anak sa biktima nga si Donna Cris Ynoc.
Ang suspek nasuko ug mihulga ngadto sa biktima nga patyon niya iyang anak.
Nakadungog si Wilmar Ursaiz, ang kapuyo ni Donna Cris. Nasuko si Wilmar nga niresulta sa sinumbagay niini ngadto sa suspek.
Ang biktima niuwang apan ang suspek nibunot sa kutsilyo ug gidunggab siya niini sa tiyan.
Ang biktima gidali sa pagdala sa Cebu Provincial Hospital sa dakbayan sa Bogo.