BODYGUARD ni Daanbantayan Mayor Vicente Loot, nasikop ug nakuhaan og armas kagahapon sa kadlawon gawas sa iyang balay sa Brgy. Malingin, lungsod sa Daanbantayan, Cebu.
Gipusasan si retired Inspector Jose Dupay, 61, human nakuhaan og duha ka kalibre .45 nga armas nga dunay magazine nga puno sa mga bala.
Si Inspector Roy Susvilla, deputy chief sa Daanbantayan Police nga nahinabi sa Superbalita Cebu, nagkanayon nga si Dupay gialarma nga naglimpiyo sa iyang armas.
Nunut niini, si Senior Inspector Adrian Nalua, ilang hepe, daling nimando nga susihon ang ilang nadawat nga impormasyon.
Sa pagsusi, naaktuhan si Dupay nga nanglmpiyo sa iyang armas.
Gipangitaag mga dukomento sa iyang gihuptan nga armas, apan way napakita hinungdan nga gipusasan.
Matod ni Susvilla nga nakainom si Dupay dihang naadtan sa kapulisan samtang naglimpiyo sa armas.
Wa manghasi sa maong lugar ang retiradong pulis opisyal samtang gi-alarma kini, apan tataw nga nakainom pero wa na gipa-liquor test.
Ang duha ka mga armas ila gihapong isumiter alang sa ballistic examination nunot sa ilang pakisusi sa hitabo diin nabuthan si Loot sa usa ka armas nga iyang gikaangol kapin sa semana na ang nalabay.
Ang bala sa armas narekuber sa crime scene dihang napusilan si Loot.
Way armas nga gitahan atol sa aksidente diin si Dupay, maoy tag-iya ug nagmaniho sa Mitsubishi pickup nga gisakyan ni Loot.
Way armas nga narekuberhuman sa hitabo ug wa matino kon asa na kini. (GPL)